Næstum allir lík­lega smitaðir eftir 24 manna úti­vistar­ævin­týri á Norður­landi

Andrea Sigurðardóttir viðskiptafræðingur er líklega smituð af kórónuveirunni eftir gönguskíðaferð sem hún fór í með vinum sínum á Norðurlandi um síðustu helgi. Af rúmlega tuttugu manna hóp eru nær allir með einkenni og nokkrir þegar greindir með veiruna. Þessu greindi Andrea frá í útvarpsþættinum Harmageddon á X977 í gær.

„Það er nú bara þannig að ég var í smá útivistarævintýri með hóp af vinum um helgina. Við komum heim og svo á þriðjudegi byrja að tikka inn, fólk orðið veikt. Hver á fætur öðrum. Við vorum orðin einhver átta til tíu í hópnum sem voru með einkenni og þá fóru ákveðnar viðvörunarbjöllur að klingja því þetta eru náttúrulega rosalega margir sem veikjast á einu bretti, búnir að vera þarna saman um helgina. Maður þekkir alveg flensuna og þannig, og hún getur verið smitandi, en þetta var svo óvenju hátt hlutfall,“ sagði Andrea.

Undir beru lofti með tvo metra á milli en smituðust samt

Þegar hún ræddi við þáttastjórnendur Harmageddon höfðu tveir úr hópnum, sem telur 24 manns, verið greindir með veiruna. Andrea sagði um að ræða fólk í viðkvæmum starfsstéttum sem fengið hefði að fara strax í sýnatöku. Jákvæð sýni úr hópnum voru þó komin upp í níu í morgun, líkt og Andrea greinir frá á Twitter-reikningi sínum. Þá voru 20 komnir með einkenni.

Ekkert hefur enn komið í ljós varðandi uppruna smitana, að sögn Andreu. Hún sagði engan úr hópnum hafa tengingu við skíðaferðir erlendis, líkt og langflestir sem greindust fyrst með veiruna hérlendis. Þá hefði hópurinn dvalið á hótelherbergjum með sérbaðherbergi, og þannig ekki gist „hvert ofan í öðru“.

„Þannig að þetta er alveg magnað. Það sem maður hugsar strax er bara. Vá, hversu ótrúlega smitandi þetta getur verið. Því það er ekki eins og við höfum ekki verið meðvituð og verið að gæta að sóttvörnum. Við vorum ekki að heilsast með handaböndum eða knúsast, við vorum að þvo hendur og spritta. 95 prósent af tímanum erum við bara úti í beru lofti með tvo metra á milli.“

Höfuðverkur og þurr hósti

Andrea hafði sjálf ekki komist í sýnatöku þegar hún ræddi við Harmageddon. Hún er ekki í forgangi þar sem hún er ekki með alvarleg einkenni, þó að hún lýsi raunar fyrstu „óhugnanlegu lungnaeinkennum“ sínum í gærkvöldi á Twitter í morgun. Þá er mikið álag á veirufræðideild Landspítala þar sem sýni hafa verið greind, sem og Íslenskri erfðagreiningu sem stendur að sýnatökum í Turninum í Kópavogi.

„Það fyrsta sem maður byrjar að finna fyrir er að maður er sár í hálsinum og með höfuðverk. Svo kemur þessi hósti, þurr hósti. Ég er með vægan hita, ég er með væg einkenni miðað við suma. Fólk er með beinverki, háan hita og líður mörgum hverjum miklu verr en mér,“ segir Andrea. Hún telur þó nær allar líkur á að hún sé með veiruna.

„Það væri allavega mjög sérstakt að ná að næla sér í eitthvað annað en hinir.“

Þeir sem eru með ætlað smit þurfa að vera í einangrun líkt og um staðfest smit sé að ræða. Andrea, sem býr ein í Reykjavík, má því ekkert fara út úr húsi. Hún kveðst þó eiga að frábært fólk sem hafi fært henni vistir.

„Ég veit ekki hvernig ég á að þvo fötin mín vegna þess að ég bý í tvíbýli og þvottahúsið er í sameign og ég má ekki fara þangað,“ sagði Andrea. „Ég hef miklu meiri áhyggjur af andlegu heilsunni en þeirri líkamlegu.“

Viðtalið við Andreu úr Harmageddon má hlusta á í heild í spilaranum hér fyrir neðan.