Veður

Djúpar lægðir í kortunum næstu sex daga

Sunna Kristín Hilmarsdóttir skrifar
Í þessari vindaspá Veðurstofunnar fyrir klukkan 18 á laugardaginn sést að það verður ansi hvasst á suðusturhluta landsins.
Í þessari vindaspá Veðurstofunnar fyrir klukkan 18 á laugardaginn sést að það verður ansi hvasst á suðusturhluta landsins. Veðurstofa Íslands

Veðurspár gera nú ráð fyrir að djúpar lægðir verði tíðir gestir fyrir sunnan og suðaustan land næstu sex dagana og jafnvel lengur.

Þetta kemur fram í hugleiðingum veðurfræðings á vef Veðurstofu Íslands. Þar segir að það sem af er október hafi vindur verið hægari á landinu en oftast sé raunin á þessum árstíma.

Margir hafi nýtt rólega daga undanfarið til útivistar í haustkyrrðinni en nú sé hins vegar breytingar á veðurlagi í vændum:

„[…] því spár gera ráð fyrir að djúpar lægðir verði tíðir gestir fyrir sunnan og suðaustan land næstu 6 daga og jafnvel lengur.

Austan- og norðaustanátt verða þá ríkjandi hjá okkur og oft á tíðum hvasst, vonandi gefast þó einhverjir dagpartar með hægari vindi milli lægða.

Með lægðunum fylgir rigning eða slydda og er útlit fyrir að mesta úrkoman verði á austanverðu landinu, en í minna mæli vestanlands,“ segir í hugleiðingunum.

Í dag verður vaxandi austanátt nú í morgunsárið og má búast við allhvössum vindi nokkuð víða þegar kemur fram á daginn. Þegar líða fer að kvöldi slær svo væntanlega í storm syðst á landinu.

„Þó ber að taka fram að norðanlands verður vindur skaplegur í dag. Í suðausturfjórðungi landsins verður lengst af rigning, en í öðrum landshlutum verður úrkoma lítil, í mesta lagi dálítil rigning um tíma. Hitinn yfirleitt á bilinu 2 til 7 stig, en kaldara norðaustantil á landinu þangað til síðdegis,“ segir í hugleiðingum veðurfræðings á vef Veðurstofunnar.

Veðurhorfur á landinu:

Gengur í austan 13-18 m/s í dag og 18-23 syðst undir kvöld, en hægari vindur norðanlands. Rigning eða slydda um landið suðaustanvert, annars úrkomulítið. Hiti 2 til 7 stig, en kaldara norðaustanlands þangað til síðdegis.

Austan 10-18 á morgun og víða rigning með köflum, talsverð úrkoma um tíma á Suðausturlandi og Austfjörðum. Hiti breytist lítið.

Á föstudag:

Austan 13-20 m/s. Rigning, talsverð á Suðausturlandi og Austfjörðum, en úrkomulítið á Norðvestur- og Vesturlandi. Dregur úr vindi seinnipartinn, fyrst syðst á landinu. Hiti 3 til 8 stig.

Á laugardag (fyrsti vetrardagur):

Norðaustan 15-23, hvassast á Vestfjörðum og í vindstrengjum suðaustanlands. Rigning eða slydda, en þurrt á Suður- og Vesturlandi. Hiti 2 til 8 stig, mildast syðst.

Á sunnudag:

Stíf norðaustanátt og víða rigning eða slydda, en þurrt suðvestantil á landinu. Hiti breytist lítið.

Á mánudag:

Norðaustlæg átt og dálítil slydda eða rigning á Norður- og Austurlandi, en bjartviðri sunnanlands. Hiti 0 til 6 stig.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.