Innlent

Faraldurinn í hægri rénun samkvæmt nýju spálíkani

Kristín Ólafsdóttir skrifar
Thor Aspelund, prófessor í líftölfræði við Háskóla Íslands, sem fer fyrir teyminu við HÍ sem vinnur spálíkan um líklega þróun Covid-19 á Íslandi.
Thor Aspelund, prófessor í líftölfræði við Háskóla Íslands, sem fer fyrir teyminu við HÍ sem vinnur spálíkan um líklega þróun Covid-19 á Íslandi. Vísir/Stöð 2

Líklega munu á bilinu 20 til 40 greinast með kórónuveiruna daglega næstu daga, samkvæmt nýju spálíkani um faraldurinn hér á landi. Spáin bendir til þess að nýsmitum fari hægt fækkandi og þá virðist smitstuðull einnig fara lækkandi, sem gefur til kynna að verið sé að ná utan um þessa þriðju bylgju faraldursins sem nú stendur yfir.

Vísindafólk frá Háskóla Íslands, embætti landlæknis og Landspítala hefur unnið að gerð spálíkans um líklega þróun faraldursins á Íslandi. Ný spá var birt í dag.

Líkt og áður segir má búast við um 20 til 40 nýjum smitum á dag næstu daga. Fjöldi nýgreindra á dag gæti þó orðið hátt í 70 en á því eru taldar minni líkur.

Eftir þrjár vikur er líklegt að daglegur fjöldi nýgreindra smita verði á bilinu 10 til 30 á dag, en gætu orðið hátt í 60 nýgreind smit.

Þá er uppsafnaður fjöldi smitaðra í þessari þriðju bylgju faraldursins, frá 13. september, 506 en eftir þrjár vikur er líklegt að uppsafnaður fjöldi verði á bilinu 800 til 1100 tilvik. Hann gæti þó orðið allt að 1650, samkvæmt spálíkaninu.

Myndin sýnir þróun greindra innanlandssmita á Íslandi frá 13. september 2020 og spá fyrir næstu þrjár vikur. Efra grafið sýnir nýgreind smit og neðra grafið sýnir uppsafnaðan fjölda smita. Punktarnir á myndunum sýna raunverulegan fjölda smita samkvæmt nýjustu gögnum.

Þá benda útreikningar til þess að núverandi smitstuðull utan sóttkvíar sé um einn. Smitstuðull segir til um það hvað einstaklingur sem sýkist mun að jafnaði smita marga aðra. Ef smitstuðullinn er fjórir mun hver og einn að jafnaði sýkja fjóra aðra, sem sýkja fjóra aðra og svo koll af kolli sem birtist í hinum margumtalaða veldisvísisvexti.

Þó að óvissan í þessum efnum sé talsverð virðist smitstuðullinn fara lækkandi.

„Þessa lækkun má líklega rekja til öflugrar smitrakningar og aukinnar vitundarvakningar um persónubundnar sóttvarnir í samfélaginu. Meðal smitstuðull alls tímabilsins fyrir einstaklinga í sóttkví er metinn 0.6 (95% líkindabil: 0,3-0,9), sem bendir til þess að sóttkví sé mjög öflug sóttvarnaaðgerð,“ segir á vef spálíkansins.

Hér má sjá mat á smitstuðlinum utan sóttkvíar eins og lýst var í síðustu rýni (25. september) þar sem tekið er tillit til hlutfalls einstaklinga sem greinist í sóttkví.

Thor Aspelund, prófessor í líftölfræði við Háskóla Íslands, segir í samtali við Vísi að spáin bendi til þess að faraldurinn sé á hægri niðurleið. Ýmis jákvæð teikn séu á lofti, til dæmis að smitstuðullinn sé kominn í kringum einn – þó að óvissan sé vissulega mikil.

„Það þýðir að það sé búið að ná að einhverju leyti utan um þetta. Annars væru miklu fleiri smit miðað við allan þann fjölda sem er búinn að smitast. Árangurinn er út af sóttkví að einhverju leyti. Þetta kemur ekki rosalega á óvart, þannig lagað,“ segir Thor.

Nýgengi á Íslandi með því mesta í Evrópu

32 greindust með kórónuveiruna innanlands í gær en 39 daginn þar áður. Sautján þeirra sem greindust í gær voru í sóttkví við greiningu. Alls eru fimm nú á sjúkrahúsi vegna Covid-19, þar af tveir á gjörgæslu. Ekkert smit greindist á landamærum í gær.

Nýgengi smita er hvergi meira á Norðurlöndunum í augnablikinu en á Íslandi. Hér á landi eru 139 smit síðustu fjórtán daga á hverja 100 þúsund íbúa. Aðeins Danmörk kemst nálægt Íslandi af Norðurlöndunum með 125 smit.

Í Svíþjóð er hlutfallið 43, 29 í Noregi og 20 á hundrað þúsund íbúa í Finnlandi samkvæmt samantekt Sóttvarnarstofnunar Evrópu.

Ísland er í sjöunda sæti Evrópuþjóða þegar kemur að nýgengi smita. Spánn er með flest smit eða 329 smit, Tékkland með 269, Frakkland 232, Lúxemborg 184, Holland 180 og Belgía 175 á hverja þúsund íbúa. Þar á eftir kemur Ísland.


Tengdar fréttir



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.