Hundruð manna bjóða náunganum aðstoð

Fyrir tæpum tveimur sólarhringum stofnaði Sara Lind Annþórsdóttir Facebook-síðuna Hjálpum fólki í áhættuhópi og á þeim stutta tíma hefur á áttunda hundrað manns boðið fram aðstoð sína.

Fólk er einfaldlega að bjóðast til að fara í búð eða útrétta fyrir þá sem þurfa að halda sig heima vegna kórónuveirunnar, hvort sem það er í sóttkví eða vegna undirliggjandi sjúkdóma.

„Ég stofnaði síðuna af því að ég hef verið að hjálpa fólki í kringum mig að fara í búð, það eru nokkrir í fjölskyldunni með lungnasjúkdóma, og svo sá ég á netinu að það voru fleiri sem þurftu aðstoð og þá datt mér í hug að fleiri gætu hjálpað,“ segir Sara Lind.

Fólk víðs vegar um landið hefur boðið fram aðstoð, setur inn færslu um hvar það er statt og býður fólki að hafa samband.

„Þeir sem þurfa á aðstoð að halda senda svo skilaboð á viðkomandi og biðja um aðstoð,“ segir Sara Lind.

Hún bendir á að það sé fólk á öllum aldri sem þarf á aðstoð að halda og vilja jafnvel ekki að sínir nánustu séu að fara í búðir til að minnka áhættu á smiti. Einnig vill hún benda á að ef fólk er í neyð, eigi ekki fyrir mat eða annað þá megi endilega koma fram með beiðni um aðstoð um slíkt.

Símavinir rjúfa einangrun

Sá hópur sem er ekki mjög virkur á Facebook eru helst aldraðir en það er hópur sem einmitt getur þurft á aðstoð að halda.

Brynhildur Bolladóttir hjá Rauða krossinum segir samtökin huga aðallega að mögulegri einangrun fólks og hvetur alla til að skrá sig í verkefni sem heitir Heimsóknarvinir.

„Við höfum breytt heimsóknarvinum í símavini og hvetjum bæði sjálfboðaliða og þá sem vilja fá símtal að hafa samband og skrá sig,“ segir Brynhildur og hvetur um leið almenning til að líta til nærumhverfisins og heyra í fólkinu í kringum sig, hvort sem það eru ættingjar eða nágrannar sem búa einir.