Kvöldfréttir Stöðvar 2

Móðir íranska transdrengsins Maní Shahidi beygði af þegar henni bárust fregnir af því í dag að fjölskyldunni yrði vísað úr landi um leið og hann útskrifast af Landspítalanum. Lögmaður fjölskyldunnar segir dómsmálaráðherra á villigötum í málinu, brotið sé á réttindum Maní með brottvísuninni. Fjallað verður um málið í fréttum Stöðvar tvö klukkan hálf sjö í kvöld.

Í fréttatímanum förum við líka yfir stöðuna í viðræðum Eflingar og Reykjavíkurborgar, en ótímabundið verkfall hefur nú staðið í tvo daga og hefur víðtæk áhrif. Þá höldum við áfram umfjöllun um mál Eyþórs Inga, fatlaðs drengs í Bolungarvík, en réttindagæslumaður hans telur stjórnvöld eiga að biðja hann afsökunar á meðferð sem hann hefur sætt. Byggðasamlag Vestfjarða harmar meðferðina á drengnum.

Loks kynnum við okkur áætlun sem grænlensk stjórnvöld hafa kynnt um útboð á olíuleit á næstu tveimur árum, meðal annars við Austur-Grænland.

Þetta og margt fleira í fréttum Stöðvar tvö klukkan 18.30.