Stjórnin tókst á um Stefán eða Kolbrúnu
Samkvæmt heimildum Vísis var stjórn Ríkisútvarpsins ohf. klofin í afstöðu sinni til tveggja umsækjenda um stöðu útvarpsstjóra. Valið stóð á milli Stefáns Eiríkssonar og Kolbrúnar Halldórsdóttur. Oddaatkvæði formanns stjórnarinnar, Kára Jónassonar, réði úrslitum. Á seinni stigum kom stjórnin sér saman um að koma fram út á við svo að sem einhugur hafi verið um val á Stefáni. Að þannig sé hagur stofnunarinnar best tryggður að valið hafi verið óumdeilt.
Atkvæði féllu fjögur gegn fjórum
Gunnar Smári Egilsson blaðamaður heldur því fram á sinni Facebooksíðu að atkvæðin hafi fallið þannig að Kolbrúnu völdu fulltrúar VG (Jón Ólafsson og Elísabet Indra Ragnarsdóttir), fulltrúi Samfylkingar (Mörður Árnason) og fulltrúi Pírata (Lára Hanna Einarsdóttir).
Stefán vildu hins vegar fulltrúar Sjálfstæðisflokksins (Jón Jónsson (varamaður Ragnheiðar Ríkharðsdóttur) og Brynjólfur Stefánsson), fulltrúi ráðherra (Kári Jónasson) og fulltrúi Viðreisnar (Birna Þórarinsdóttir). Þetta rímar við heimildir Vísis.
Eftir því sem Vísir kemst næst sat Guðlaugur G. Sverrisson, fulltrúi Miðflokksins, hjá en hann mun ekki vera sáttur við valið á Stefáni, afstöðu sem meðal annars má rekja til ágreinings sem borgarfulltrúi Miðflokksins, Vigdís Hauksdóttir átti við Stefán og hóp starfsmanna Ráðhússins.
Atkvæði féllu þannig jöfn 4/4. Valgeir Vilhjálmsson situr í stjórn sem fulltrúi stofnunarinnar en samkvæmt lögum um Ríkisútvarpið ohf. hefur hann ekki atkvæðisrétt.
Ragnheiður tengdist nokkrum umsækjenda
Ragnheiður Ríkharðsdóttir, varaformaður stjórnar Ríkisútvarpsins, sagði sig frá ráðningarferlinu. Í samtali við Vísi sagðist hún hafa gert það um leið og listi umsækjenda lá fyrir í ljósi þess að hún taldi sig vera í of nánum tengslum við nokkra umsækjendur. Um sé að ræða fólk sem hún hefur starfað með á vettvangi stjórnmálanna, sem og annars staðar.
„Persónuleg tengsl mín gerðu það að verkum að ég leit svo á að hæfisreglur stjórnsýslunnar segðu: „Þú getur ekki tekið þátt í þessu ferli,“ segir Ragnheiður. Því hafi hún sagt sig frá því, fyrrnefndur Jón Jónsson komið inn í hennar stað og hún ekki heyrt af ráðningu Stefáns fyrr en í fjölmiðlum í gær.
„Þegar maður segir sig frá einhverju eða víkur sæti - þá gerir maður það 100%,“ undirstrikar Ragnheiður.
Tengdar fréttir
Telur óskynsamlegt að taka RÚV af auglýsingamarkaði
Stefán Eiríksson, sem í dag var tilkynnt um að hefði verið ráðinn í stöðu útvarpsstjóra, segir að í sínum huga sé hlutverk Ríkisútvarpsins að miðla til íslensku þjóðarinnar gæðaefni sem kallað er eftir hverju sinni. Hann telur ekki að RÚV eigi að hverfa af auglýsingamarkaði.
Stefán Eiríksson nýr útvarpsstjóri
Borgarritari og fyrrverandi lögreglustjóri kominn í Efstaleitið.
Frumkvöðlastarf á Facebook kom Stefáni í Efstaleitið
Frumkvöðlastarf Stefáns Eiríkssonar á sviði upplýsingagjafar lögreglu um sjálfa sig, sem miðaði að því að bæta ímynd hennar, var eitt af því sem vó þungt í afstöðu stjórnar Ríkisútvarpsins til umsóknar hans
Skiptar skoðanir á ráðningu nýs útvarpsstjóra
Stefán Eiríksson, borgarritari og fyrrverandi lögreglustjóri í Reykjavík, hefur verið ráðinn útvarpsstjóri. Tilkynnt var um ráðningu hans á fjórða tímanum í dag.
