Innlent

Hlupu frá lögreglu þegar ekki var hægt að aka

Vésteinn Örn Pétursson skrifar
Alls voru 72 mál bókuð hjá lögreglunni á höfuðborgarsvæðinu í gærkvöldi og í nótt.
Alls voru 72 mál bókuð hjá lögreglunni á höfuðborgarsvæðinu í gærkvöldi og í nótt. Vísir/Vilhelm

Lögreglan á höfuðborgarsvæðinu fékk í gær tilkynningu um ökumann sem talið var að gæti verið undir áhrifum áfengis eða fíkniefna. Ökumaður og farþegi flúðu frá lögreglu þegar hún veitti bifreið þeirra eftirför. Þetta kemur fram í dagbók lögreglu.

Þar segir að tilkynning um ökumann sem hugsanlega væri undir áhrifum hefði borist. Þegar lögregla hafi komið auga á bifreiðina sem tilkynningin sneri að hafi orðið stutt eftirför þar sem ökumaður hafi ekki sinnt stöðvunarmerkjum lögreglu.

Í botnlangagötu hafi síðan karl og kona hlaupið út úr bifreiðinni. Þau hafi hins vegar náðst og verið handtekin skömmu síðar. Lögregla segir að við nánari skoðun hafi komið í ljós að bifreiðin var stolin og ökumaðurinn reynst undir áhrifum vímuefna.

Grímuklæddir menn létu greipar sópa

Þá var tilkynnt um innbrot í ljósmyndavöruverslun í austurhluta Reykjavíkurborgar, að því er fram kemur í dagbók lögreglu. Grímuklæddir menn hafi þar stolið fjölda myndavéla. Lögregla er nú með málið til rannsóknar.

Samkvæmt upplýsingum frá lögreglunni voru alls 72 mál bókuð frá klukkan 17 í gær til klukkan 5 í morgun. Vista þurfti þrjú í fangageymslu og fjögur voru stöðvuð grunuð um akstur undir áhrifum áfengis eða fíkniefna.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.