Innlent

Ný höft tekið gildi

Stefán Ó. Jónsson skrifar
Fólk safnaðist saman við Orkuhúsið í morgun til að komast í hina svokölluðu seinni skimun. Eins og sjá má voru tveggja metra fjarlægðarmörk í fyrirrúmi.
Fólk safnaðist saman við Orkuhúsið í morgun til að komast í hina svokölluðu seinni skimun. Eins og sjá má voru tveggja metra fjarlægðarmörk í fyrirrúmi. vísir/arnar

Nýr kafli í baráttu landsmanna við kórónuveiruna hófst á hádegi. Eftir síaukið frjálsræði frá 4. maí síðastliðnum voru aðgerðir hertar aftur eftir fjölgun smitaðra að undanförnu. Nú eru 50 í einangrun í landinu og hafa ekki verið fleiri síðan 2. maí. 

Til að sporna við frekari útbreiðslu voru neðangreind höft innleidd á hádegi. Þau verða í gildi næstu tvær vikurnar hið minnsta. Aðgerðirnar eru: 

• Takmörkun á fjölda sem kemur saman miðast við 100 einstaklinga. Börn fædd 2005 eða síðar eru undanskilin. 

• Hvar sem fólk kemur saman og í allri starfsemi skal viðhöfð sú regla að hafa a.m.k. 2 metra á milli einstaklinga.

• Þar sem ekki er hægt að tryggja 2 metra fjarlægð milli ótengdra einstaklinga er krafist notkunar andlitsgrímu sem hylur nef og munn. Þetta á t.d. við um almenningssamgöngur, þ.m.t. innanlandsflug og farþegaferjur, og starfsemi s.s. hárgreiðslustofur og nuddstofur. Andlitsgrímur sem notaðar eru utan heilbrigðisþjónustu ættu að uppfylla kröfur sem settar eru fram í leiðbeiningum sóttvarnalæknis. 

• Vinnustaðir, opinberar byggingar, verslanir og þjónustufyrirtæki sem eru opin almenningi skipuleggi starfsemi sína í samræmi við ofangreint og skulu tryggja að ekki séu fleiri en 100 einstaklingar í sama rými og að í minni rýmum séu ekki fleiri en svo að hægt sé að tryggja 2 metra fjarlægð milli einstaklinga.

• Verslanir, opinberar byggingar og þjónustufyrirtæki sem eru opin almenningi skulu tryggja aðgang að handsótthreinsi fyrir almenning og starfsmenn við innganga og í grennd við yfirborð sem margir snerta s.s. snertiskjái og afgreiðslukassa, sinna vel þrifum og sótthreinsun yfirborða eins oft og unnt er og minna almenning og starfsmenn á einstaklingsbundnar sóttvarnir með merkingum og skiltum. 

Starfsemi sundlauga í Reykjavík verður löguð að þeim fjöldatakmörkunum sem tóku gildi á hádegi.Vísir/Vilhelm Gunnarsson

• Sundlaugar og veitingastaðir skulu tryggja að gestir geti haft 2 metra bil á milli sín í öllum rýmum með fjöldatakmörkun í samræmi við stærð hvers rýmis.

• Starfsemi sem í eðli sínu felur í sér að gestir noti sameiginlegan búnað s.s. íþróttastarf, líkamsræktarstöðvar, spilakassar og spilasalir skulu gera hlé á starfsemi eða sótthreinsi slíkan búnað milli notenda.

• Söfn, skemmtistaðir og aðrir opinberir staðir eiga að gera hlé á starfsemi sé ekki hægt að tryggja að farið sé eftir fjöldatakmörkun eða að bil milli ótengdra aðila sé yfir 2 metrum.

Breytingar á landamærunum

Tvöföld sýnataka við komuna til landsins var útvíkkuð. Hún nær nú til allra sem koma frá áhættusvæðum og dvelja hér 10 daga eða lengur. Þau skulu jafnframt viðhafa heimkomusmitgát og skal seinni sýnatakan fara fram á fjórða til sjötta degi Íslandsferðar. Sú fyrri fer áfram við komuna til landsins. 

Ef þessi ráðstöfun ber ekki árangur og innlend smit koma upp tengd komufarþegum þrátt fyrir beitingu þessara ráðstafana þarf hugsanlega að efla aðgerðir á landamærum enn frekar, að sögn hins opinbera.

Röðin við Orkuhúsið náði nánast að Ármúla.vísir/arnar

Tengdar fréttir

Ellefu innanlandssmit til viðbótar

Ellefu ný innanlandssmit kórónuveirunnar greindust síðasta sólarhringinn og eru alls 50 nú í einangrun á landinu.

Engin hættulaus leið til að opna landamæri

Alþjóðaheilbrigðismálastofnunin, WHO, segir ómögulegt að opna landamæri ríkja án áhættu á meðan heimsfaraldur nýju kórónuveirunnar stendur yfir. Þrátt fyrir það sé ekki hægt að hafa landamæri lokuð til lengdar.

Þríeykið snýr aftur á upplýsingafundi í dag

Almannavarnadeild ríkislögreglustjóra og embætti landlæknis boða til upplýsingafundar vegna faraldurs kórónuveiru klukkan 14 í húsakynnum landlæknisembættisins við Katrínartún.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.