Var lengi vel með mikla minnimáttarkennd vegna útlitsins

Þorgerður Katrín Gunnarsdóttir segist hafa verið með lélega sjálfmynd á unglingsárum eins og svo margir. Þá séu veikindi dóttur hennar það erfiðasta sem hún hafi glímt við á ævinni og vilji ekki þurfa að endurtaka.

Sindri Sindrason settist niður með alþingiskonunni einn morguninn á heimili hennar í Hafnarfirðinum og fóru þau yfir ýmis mál, þar á meðal morgunrútínuna. Klukkan var átta þegar Sindra bar að garði. 

„Mér finnst gott að vakna snemma og hef ekki þurft að sofa mikið í gegnum tíðina,“ segir Þorgerður Katrín Gunnarsdóttir, formaður Viðreisnar. 

Þorgerður býr með eiginmanni sínum Kristjáni Arasyni og segir hún að hann færi stundum eiginkonunni kaffi í rúmið. Þorgerður og Kristján eiga þrjú börn. Gunnar Ara, sem er í íþróttafræði í HR, Gísla Þorgeir handboltamann, og Katrínu Erlu sem er í FB.

Þorgerður fór í lögfræði eftir MS og vegna þess að lögfræðin er praktísk.

„Ég ætlaði í dýralækninn og ef ég væri að fara aftur í nám þá færi ég alltaf í dýralækninn. Ég var á náttúrufræðisviði í MS og ætlaði alltaf að fara þá leið.“

Hún var lengi vel í Sjálfstæðisflokknum og sat á þingi fyrir flokkinn í mörg ár en segist ekki sakna flokksins.

Erum enn þá vinkonur

„En ég viðurkenni það alveg að það eru ákveðnar manneskjur sem ég sakna og við erum ennþá vinkonur.“

Hún útilokar ekki að mynda einhvern tímann ríkisstjórn með flokknum og útilokar hún almennt enga flokka. Sindri spurði þingmanninn hvernig móðir hún væri.

„Ég held ég geti stundum verið svolítið hörð en ég vona líka að ég sýni blíðuna inni á milli.“

Sjálf ólst Þorgerður upp með lítið sjálfstraust og var eins og margar unglingsstúlkur á þeim tíma óánægð með eigið útlit og hæð. Þá sá hún mjög illa og hefur Kristján eiginmaður hennar grínast með að hún hafi ekki verið með linsurnar þegar þau hittust fyrst.

Mesta gleðin fylgir börnunum

„Ég varð gleraugnaglámur og var með mikla minnimáttarkennd. Ég sá mjög illa og fór í aðgerð fyrir einhverjum tólf eða fjórtán árum. Sjálfsmyndin var ekkert rosalega sterk framan af.“

Hún hafi verið með þykk gleraugu sem stundum eru kennd við kókflöskubotna.

Það sem gleður hana mest er að sjá ánægju hjá börnunum. Hins vegar sé ekkert erfiðara en að glíma við veikindi barna sinna og þá hræðslu sem fylgir þeim. Katrín dóttir þeirra hjóna greindist með heilaæxli árið 2008. 

„Að eiga barn og þú veist ekkert hvað gerist er erfiðasta reynslan af þeim öllum sem ég hef í farteskinu. Þegar hún veiktist á sínum tíma, er eitthvað sem ég vil ekki gera aftur,“ segir Þorgerður Katrín.

„Maður er þakklátur og þetta var kraftaverk og íslenska heilbrigðiskerfið er frábært.“

Hún vill að við verðum á varðbergi og þora að taka skref fram á við. Skapa þurfi jöfn tækifæri fyrir alla, Íslendinga sem útlendinga hér á landi.