Segir það reyna á sálina að horfa upp á dóttur sína einangraða í sóttkví

Flestir Íslendingar kannast nú við einhvern sem þurft hefur að fara í sóttkví vegna útbreiðslu kórónuveirunnar margumræddu. Hafa sumir talað fyrir því að slíkt geti verið tækifæri fyrir fjölskyldur til að njóta kærkominna samverustunda. Slíkt er hins vegar ekki alltaf í boði.

Mikið hefur reynt á heimilislíf Öglu Björnsdóttur og fjölskyldu eftir að dóttir hennar þurfti að fara í sóttkví. Agla taldi að fullvíst að það myndi þýða að allri þriggja manna fjölskyldunni yrði gert að fara saman í sóttkví á heimilinu en annað kom á daginn.

Fór í sóttkví eftir að smit kom upp í dansskóla

Dóttir hennar, sem er nýorðin fjórtán ára, er fullfrísk en Agla hefur áhyggjur af þeim áhrifum sem hin mikla einangrun muni hafa á líðan hennar og annarra fjölskyldumeðlima. Henni var komið í sóttkví eftir að samnemandi hennar í dansskóla greindist með kórónuveiruna á dögunum.

„Við erum þrjú í heimili og það að tveir heimilismenn fái að vera saman í tvær vikur, borða saman, horfa á sjónvarpið saman og bara vera saman á heimilinu en sá þriðji ekki sem í þessu tilfelli er barn er mjög brútal,“ segir Agla í Facebook-færslu þar sem hún vakti athygli á aðstæðunum.

Reynt mikið á fjölskylduna

Agla segir í samtali við Vísi að þessar aðstæður hafi reynt mikið á dóttur sína og aðra fjölskyldumeðlimi þó skammur tími sé enn liðinn frá því að hún var sett í sóttkví á þriðjudag.

„Henni er náttúrulega kippt út úr öllu, eins og svo sem öllum væri gert. Hún er að æfa einhverja fimmtán tíma á viku í dansi og hún er í skólanum, það er mikið að gera og allt í einu er þér bara kippt út og þú mátt ekki einu sinni knúsa foreldra þína.“

Saknar þess að geta faðmað dóttur sína

„Þó að þetta sé álag á okkur foreldranna þá er þetta auðvitað miklu meira álag á hana.“

Agla saknar þess mest að geta ekki faðmað og knúsað dóttur sína eins og hún er vön. Foreldrarnir mega ekki koma nálægt henni á meðan sóttkvínni stendur og dvelur hún að mestu í sínu eigin herbergi.

„Ef hún kemur fram, þá setur hún upp hanska og lætur vita að hún sé að koma. Matinn skil ég eftir á stigaþrepinu þar sem hún sækir hann þegar ég er farin og borðar ein.“

Fjöldi barna í sömu stöðu og þau

Töluverðum fjölda barna var gert að fara í sóttkví eftir að upp komst um smitið í umræddum dansskóla og því er ljóst að fleiri fjölskyldur séu að ganga í gegnum slíkt hið sama.

„Ungir krakkar eru að missa úr skóla og tómstundum og þurfa að auki að halda sig í fjarlægð frá öðrum fjölskyldumeðlimum. Þetta reynir á sálina.“

Taka einn dag í einu

Agla hefur íhugað það að fara sömuleiðis í sóttkví til þess að fá að umgangast dóttur sína.

„Við bara tökum hvern dag í einu. Þetta auðvitað reynir andlega á krakkana og ef að þess þarf þá geri ég það.“

Hún segir það þó skýrt að samkvæmt tilmælum almannavarna beri að gera þetta með þessum hætti til að minnka áhættuna á frekari smitum. Staðan sé hins vegar allt önnur þegar um yngri börn er að ræða sem eigi erfiðara með að bjarga sér sjálf.