Undirbýr kvörtun til Persónuverndar vegna færslu Heitirpottar.is

Tómas Kristjánsson, lögfræðingur og eigandi fyrirtækisins Lögréttu, telur að heitirpottar.is, sem rekið er af Kristjáni Berg Ásgeirssyni, sem betur er þekktur sem Fiskikóngurinn, brotið persónuverndarlög þegar myndir sem innihéldu persónuupplýsingar viðskiptavina voru birtar á Facebook-síðu fyrirtækisins. Hann gerir ráð fyrir að skila kvörtun til Persónuverndar vegna málsins á morgun.

Í gær birtust á Facebook-síðu fyrirtækisins myndir af skjölum til staðfestingar á seldum pottum. Á skjölunum má glögglega sjá nöfn kaupenda, símanúmer og í sumum tilfellum heimilisföng. Þá kemur fram hvers lags pottur var keyptur og hvenær fyrirhugað er að hann verði sóttur.

„Þessi birting eins og hún er þarna, þetta telst vera vinnsla persónuupplýsinga samkvæmt persónuverndarlögum,“ segir Tómas og vísar sérstaklega til 8. greinar laga um persónuvernd og vinnslu persónuupplýsinga, þar sem meginreglur um vinnslu persónuupplýsinga er að finna.

Tómas bendir jafnframt á að ákvæðið sem vísað er til sé ekki nýtilkomið. Þannig geti menn ekki „skýlt sér á bak við það“ að Alþingi hafi samþykkt nýja persónuverndarlöggjöf í júní 2018. Hann segir sambærilegt ákvæði hafa verið í fyrri persónuverndarlögum frá árinu 2000.

Tómas segist hafa verið í sambandi við nokkra þeirra viðskiptavini sem nafngreindir voru í færslunni. Þeir séu flestir óánægðir með uppátækið. Þá geri hann ráð fyrir því að vera kominn með umboð til að ganga frá formlegri kvörtun til Persónuverndar á morgun.

Kristján Berg Ásgeirsson, eigandi Heitirpottar.is, sagði í samtali við Vísi að engar kvartanir hefðu borist vegna málsins og að um mistök hafi verið að ræða. Um leið og hann hafi áttað sig á hvernig var í pottinn búið hafi færslan verið fjarlægð.

„Ég vil lítið vera að tjá mig um þetta en það var engin ætlun hjá okkur að fara að birta einhverjar upplýsingar,“ sagði Kristján.