Um 75 prósent vilja þjóðaratkvæði

Þrír af hverjum fjórum vilja að haldin verði þjóðaratkvæðagreiðsla um frumvarp Stjórnlagaráðs til stjórnarskrár og flestir vilja að þjóðaratkvæðagreiðslan verði látin ráða úrslitum um afgreiðslu frumvarpsins. Þetta er niðurstaða könnunnar MMR.

Fyrirtækið kannaði afstöðu fólks til þess hvert hlutverk þjóðaratkvæðagreiðslu ætti að vera við afgreiðslu á frumvarpi Stjórnlagaráðs til stjórnarskrár.

Af þeim 75,3 prósent sem vildu að haldin yrði þjóðaratkvæðagreiðsla sögðu 47,7 prósent að niðurstaða þjóðaratkvæðagreiðslunnar ætti að ráða úrslitum um afgreiðslu frumvarpsins og 27,6 prósent að þjóðaratkvæðagreiðslan ætti að vera leiðbeinandi fyrir Alþingi.

Um fjórðungur, eða 24,7% þeirra sem tóku afstöðu til spurningarinnar, vildu ekki að haldin yrði þjóðaratkvæðagreiðsla um frumvarpið.

Spurt var:„Hvert af eftirfarandi telur þú að sé æskilegt hlutverk þjóðaratkvæðagreiðslu við afgreiðslu á frumvarpi Stjórnlagaráðs til stjórnarskrár?"

Svarmöguleikar voru:„Haldin verði þjóðaratkvæðagreiðsla sem verði látin ráða úrslitum um afgreiðslu stjórnarskrárfrumvarpsins", „Haldin verði þjóðaratkvæðagreiðsla sem verði leiðbeinandi fyrir Alþingi við afgreiðslu stjórnarskrárfrumvarpsins", „Það verði ekki haldin þjóðaratkvæðagreiðsla" og „Veit ekki/vil ekki svara".

Samtals tóku 71,3% afstöðu til spurningarinnar.

Svarfjöldi:818 einstaklingar

Dagsetning framkvæmdar:15.-18. ágúst 2011

Nánar hér.