Varðstjóri sýknaður - mátti aflífa hreindýr og skera úr því kjöt

Varðstjóri lögreglunnar var sýknaður í Héraðsdómi Austurlands í síðustu viku. Hann var ákærður fyrir að hafa gerst brotlegur í opinberu starfi með því að hafa misnotað stöðu sína sem aðalvarðstjóri og komið því til leiðar, er hann var á frívakt, að hann sinnti sjálfur aflífun særðs hreindýrs, sem tilkynnt hafði verið um að væri fast í girðingu, undir því yfirskini að hann væri að sinna verkefni lögreglu, en í þeim tilgangi að komast yfir kjöt af dýrinu til eigin nota, og notfært sér í því skyni lögreglubifreið, skotvopn og annan búnað og aðstöðu lögreglu í eigin þágu.

Þannig var hann sakaður um að hafa aflífað dýrið, blóðgað, fært skrokkinn til á afvikinn stað og skorið úr því hryggjarvöðva og farið síðar með kjötið á heimili sitt.

Það var undirmaður varðstjórans sem grunaði að ekki væri allt með felldu þegar hann fann dýrið og sá að það var búið að skera úr því hryggjarvöðvann. Í kjölfarið var húsleit framkvæmd hjá varðstjóranum, en þá framvísaði hann tæplega hálfu kílói af hryggjarvöðva, sem þótti þó ekki álitlegur til áts.

Varðstjórinn neitaði alfarið sök. Í niðurstöðu héraðsdóms segir að það hafi verið ósannað að varðstjórinn hefði skorið meira af dýrinu en þann bút af hryggjarvöðva sem hann framvísaði við húsleit.

Þá hefur framburður ákærða um að hafa talið dýrið rýrt og haldið sjúkdómum verið stöðugur frá upphafi og samræmist því sem í ljós kom við krufningu dýrsins.

Þá bendir framburður kjötiðnaðarmanns sem skoðaði hið haldlagða kjöt ekki til þess að þetta tiltekna kjötstykki hafi verið álitlegt til áts, þótt almennt sé hryggjarvöðvi talinn meðal bestu bitanna af hreindýri. Styður allt þetta ekki sérstaklega þann málatilbúnað ákæruvaldsins, að því er fram kemur í niðurstöðu dómarans, að ákærði hafi skorið sér kjötið í eigin þágu.

Varðstjórinn var fyrir dómi ekki spurður út í það hvort hann hafi hugsanlega ætlað að gefa hundinum sínum kjötið og er það ósannað að því er fram kemur í niðurstöðu dómara.