Ráðuneytisstjóri verður sendiherra

Össur Skarphéðinsson utanríkisráðherra hefur skipað Einar Gunnarsson ráðuneytisstjóra í utanríkisráðuneytinu frá 1. október næstkomandi samkvæmt tilkynningu frá ráðuneytinu.

Þá verður Benedikt Jónsson, sem verið hefur ráðuneytisstjóri, sendiherra í London frá sama tíma.

Einar hefur undanfarin ár gegnt ábyrgðarstöðum í utanríkisþjónustunni, á aðalskrifstofu og sendiskrifstofunum í Brussel og Genf.

Var Einar meðal annars starfsmannastjóri og síðast skrifstofustjóri yfir viðskiptasamningum samkvæmt tilkynningu.

Benedikt á að baki víðtæka reynslu í utanríkisþjónustunni en áður en hann tók við embætti ráðuneytisstjóra var hann meðal annars sendiherra Íslands í Moskvu og fastafulltrúi og sendiherra hjá alþjóðastofnunum í Genf.