Ríkislögreglustjóri segir að útboð hafi verið ómögulegt

Innkaup á gasi og öðrum óeirðarbúnaði sem lögreglan keypti í fyrra voru skyndiinnkaup vegna neyðarástands sem skapaðist í kjölfar efnahagshrunsins á Íslandi. Þetta kemur fram í yfirlýsingu frá Ríkislögreglustjóra vegna ábendingar Ríkisendurskoðunar um að ekki hafi verið staðið eðlilega að kaupum á búnaði fyrir lögregluna fyrir 91 milljón króna.

Ríkislögreglustjóri segist að sjálfsögðu vera sammála Ríkisendurskoðun um að innkaup eigi að bjóða út eða leita tilboða í samræmi við lög um opinber innkaup. Það hafi hins vegar ekki verið hægt í þessum tilfellum. Ríkislögreglustjóri hafi ákveðið að höfðu samráði við dómsmálaráðherra að leita allra leiða til að afla nauðsynlegs öryggis- og varnarbúnaðar fyrir lögregluna.

Vísir hefur gert ítrekaðar tilraunir til að ná tali af Haraldi Johannessen ríkislögreglustjóra í dag án árangurs.