Öryggisráð SÞ kemur saman vegna Egyptalands

Öryggisráð Sameinuðu þjóðanna kemur nú saman vegna ástandsins í Egyptalandi. Í gær létust að minnsta kosti 638 manns þegar varðsveitir réðust á hóp mótmælenda í Kaíró. Samkvæmt arabísku fréttasíðunni Al Arabiya átti fundurinn að hefjast fyrir luktum dyrum klukkan hálf tíu í kvöld að íslenskum tíma.

Frakkland, Bretland og Ástralía kölluðu eftir fundinum til þess að ræða þær róttæku aðgerðir sem stjórnvöld í Egyptalandi, sem studd eru af hernum, gripu til gegn mótmælendunum.

Mótmælendurnir eru stuðningsmenn fyrrum forseta Egyptalands, Mohammeds Morsi, sem var rekinn frá völdum af hernum fyrr í sumar. Stuðningsmenn hans hafa stundað sitjandi mótmæli undanfarnar vikur þar sem krafist er þess að hann verði settur aftur í embætti.

Barack Obama, forseti Bandaríkjanna, og Ban Ki-moon, aðalframkvæmdastjóri Sameinuðu þjóðanna, hafa fordæmt aðgerðirnar. Obama aflýsti fyrirhuguðum sameiginlegum heræfingum Egyptalands og Bandaríkjanna og sagði hann að samvinna milli landanna gæti ekki átt sér stað á meðan brotið væri á borgurum.