Tina Fey ólétt

Grínistinn Tina Fey, sem þekktust er fyrir hlutverk sitt í 30 Rock, á von á öðru barni sínu. Hún er gengin fimm mánuði með barn sitt og eiginmannsins, tónskáldsins Jeffs Richmond.

Tina greindi frá barnaláni sínu í viðtali í sjónvarpsþætti Opruh Winfrey. Þar var hún að kynna nýja bók sína og ræða tilvonandi endurfundi í Saturday Night Live.

 

Hin fertuga Tina á fyrir fimm ára dóttur með eiginmanninum. Ekki er búist við því að óléttan muni hafa áhrif á framleiðslu sjónvarpsþáttanna 30 Rock en nú er verið að sýna fimmtu þáttaröðina. Tina leikur sem kunnugt er annað aðalhlutverkið auk þess að framleiða þættina. Hinn aðalleikarinn, Alec Baldwin, greindi frá því á dögunum að þættirnir myndu hætta á næsta ári. Í frétt Hollywood Reporter segir að þessar yfirlýsingar séu rangar og engin slík ákvörðun hafi verið tekin.