Leikir í enska boltanum án þula?

Skjár einn ætlar að hlíta úrskurði útvarpsréttarnefndar frá því í gær og verður strax um helgina hætt að sýna leiki með enskum þulum. Verkefnastjóri enska boltans á Skjá einum segir að um helgina verði jafnvel sendir út leikir án lýsingar þula. Útvarpsréttarnefnd beindi því í gær til Skjás eins að hætta þegar útsendingum á knattspyrnuleikjum sem ekki fylgir tal eða texti á íslensku. Útsendingar af þessu tagi brytu enda í bága við ákvæði útvarpslaga þar sam segir að efni á erlendu máli á íslenskri sjónvarpsstöð verði jafnan að fylgja íslenskt tal eða texti. Snorri Már Skúlason, verkefnisstjóri enska boltans á Skjá einum, segir að gripið verði til aðgerða strax vegna úrkurðarins. Nú um helgina komi vel til greina að senda leikina út án lýsingar. Hann segir að það sé hins vegar ekki framtíðarlausn og verði líklega aðeins um helgina. Hann segir forsvarsmenn Skjás eins þegar farna að huga að því hvernig finna megi varanlega lausn á málinu. Væntanlega liggi þó ekkert fyrir fyrr en í fyrsta lagi á þriðjudaginn þegar Skjár einn og útvarpsréttarnefnd fundi vegna málsins.