Pogba ekki seldur þrátt fyrir að „hugsa bara um hárgreiðslur og skó“

Paul Pogba verður ekki seldur frá Manchester United í sumar þrátt fyrir meint ósætti á milli hans og knattspyrnustjórans Jose Mourinho.

Yahoo Sport greinir frá þessu og hefur eftir heimildarmanni að Mourinho hafi ekkert á móti Pogba, heldur sé franski landsliðsmaðurinn einfaldlega ekki nógu einbeittur á fótboltann.

„Jose líkar við leikmanninn, en hann er ekki að einbeita sér að fótbolta. Pogba er að hugsa um tónlist, hárgreiðslur og skó,“ er haft eftir heimildarmanni í greininni.

Mourinho og Didier Deschamps, landsliðsþjálfari Frakklands, eiga að hafa rætt saman um Pogba og verið sammála um að leikmaðurinn þurfi að hreinsa til í forgangsröðun sinni.

Þegar Mourinho hefur rætt mál Pogba í fjölmiðlum hefur hann alltaf farið mikinn um hæfileika hans.

„Með eins marga miðjumenn og við höfum þá getur komið upp misskilningur milli manna. Það er enginn misskilningur milli mín og Paul. Hann er miðjumaður og það er erfitt að finna efnilegri miðjumann en hann, Paul hefur allt,“ sagði Jose Mourinho í viðtali á dögunum.

Pogba tók ekki þátt í vináttulandsleik Frakklands og Kólumbíu á föstudaginn en kom inn í liðið gegn Rússum í gær og skoraði mark beint úr aukaspyrnu.

Pogba ætti að vera tilbúinn til leiks þegar Manchester United mætir Swansea á Old Trafford á laugardaginn, en spurning hvort Mourinho gefi honum traustið í byrjunarliðið á nýju.