Vill lækka matarskatt

Samfylkingin lagði í gær til að matarskattur yrði lækkaður um helming síðari hluta ársins 2005: "Þetta kemur öllum vel og sérstaklega milli- og lágtekjufólki" segir í yfirlýsingu flokksins. Þá leggur flokkurinn til að hækkun barnabætur verði flýtt og þær hækki strax um 2,5 milljarða króna. Össur Skarphéðinsson, formaður Samfylkingarinnar kynnti hugmyndir flokksins í umræðum á þingi í gær og lagði hann til að matarskattslækkunin kæmi í stað eins prósents lækkunar tekjuskatts sem á að koma til framkvæmda um áramót: "Þetta vegur hvort annað upp." Sagði hann að lækkunin væri ekki þensluhvetjandi því neysluvísitala lækkaði á móti. Össur sakaði framsóknarmenn um að standa eina gegn lækkun matarskatts. Halldór Ásgrímsson, forsætisráðherra sagði rétt að hann hefði verið efins um tvö skattþrep en fyrst það væri á annað borð til skipti engu höfuðmáli hver prósentan væri. Geir H. Haarde sakaði Samfylkinguna um að hentistefnu og sagði flokkinn hafa stolið stefnu Sjálfstæðisflokksins um lækkun matarskattar.