Innlent

Þurrasti nóvember í áratugi

Sunna Kristín Hilmarsdóttir skrifar
Meðalhiti í Reykjavík í nóvember var 2,4 stig og er það 1,2 stigum yfir meðallagi áranna 1961 til 1990, en -0,3 stigum undir meðallagi síðustu tíu ára.
Meðalhiti í Reykjavík í nóvember var 2,4 stig og er það 1,2 stigum yfir meðallagi áranna 1961 til 1990, en -0,3 stigum undir meðallagi síðustu tíu ára. vísir/vilhelm

Nýliðinn nóvembermánuður var óvenju hægviðrasamur og tíðin hagstæð samkvæmt samantekt á vef Veðurstofu Íslands.

Óvenju þurrt var um norðanvert landið og var mánuðurinn víða um land þurrasti nóvembermánuður um áratugaskeið. Kaldast var á Norðausturlandi en hlýrra vestan til á landinu.

Meðalhiti í Reykjavík í mánuðinum var 2,4 stig og er það 1,2 stigum yfir meðallagi áranna 1961 til 1990, en -0,3 stigum undir meðallagi síðustu tíu ára.

Á Akureyri var meðalhitinn -0,8 stig, -0,5 stigum undir meðallagi áranna 1961 til 1990, en -1,8 stigum undir meðallagi síðustu tíu ára. Í Stykkishólmi og í Höfn í Hornafirði var meðalhitinn 2,0 stig.

Hvað úrkomuna varðar þá voru allmörg þurrkamet slegin. Á Akureyri mældist úrkoma aðeins 4,6 mm sem eru tæp 10% af meðalúrkomu áranna 1961 til 1990. Þetta er næstþurrasti nóvembermánuður frá upphafi samfelldra úrkomumælinga á Akureyri 1927. Þurrara var í nóvember 1952 þegar úrkoman mældist 3,0 mm.

Fleiri sólskinsstundir í Reykjavík en í meðalári

Í Reykjavík mældist úrkoman 73,1 mm sem er jafnt meðallagi áranna 1961 til 1990. Úrkoman í Stykkishólmi mældist 36,1 mm sem er um helmingur af meðaltali áranna 1961 til 1990.

Dagar þegar úrkoma mældist 1,0 mm eða meiri á Akureyri voru aðeins 3, átta færri en í meðalári. Í Reykjavík mældist úrkoma 1,0 mm eða meiri 13 daga, jafnmargir og í meðalári.

Þá mældust sólskinsstundir í Reykjavík 49,2, sem er 10,6 stundum fleiri en í meðalári. Á Akureyri mældust sólskinsstundirnar 18,0, sem er 3,7 stundum fleiri en í meðalári.

Meðalhiti í Reykjavík fyrstu 11 mánuði ársins var 6,3 stig sem er 1,6 stigum ofan meðallags áranna 1961 til 1990 en 0,4 stigum ofan meðallags síðustu tíu ára. Meðalhitinn raðast í 6. til 7. sæti á lista 149 ára.

Á Akureyri var meðalhiti mánaðanna ellefu 4,8 stig. Það er 1,1 stigi ofan meðallags áranna 1961 til 1990 en -0,2 stigum undir meðallagi síðustu tíu ára. Meðalhitinn þar raðast í 25.sæti á lista 139 ára. Úrkoma í Reykjavík hefur verið 11% umfram meðallag og 15% umfram meðallag á Akureyri.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.