Kvöldfréttir Stöðvar 2

Á meðan Landssamband lögreglumanna fagnar áformum um að gerð verði stjórnsýsluúttekt á embætti ríkislögreglustjóra vill ríkislögreglustjóri að ráðist verði í heildarúttekt lögreglumála í landinu. Fjallað verður ítarlega um málið í kvöldfréttum Stöðvar 2 á eftir og rætt við fulltrúa lögreglumanna og ríkislögreglustjóra.

Við segjum einnig frá því að það sem af er ári hafa helmingi fleiri karlar leitað til Bjarkahlíðar en allt árið í fyrra. Verkefnastýra segir að karlar séu ólíklegri til að kæra ofbeldið þar sem þeir óttist viðbrögð samfélagsins.

Kýr á breskri rannsóknarstofu borða nú íslenskt þang undir vökulum augum vísindamanna. Vonast er til þess að fæðan dragi úr metangaslosun.

Enn er allt í hnút vegna Brexit. Áhrif hugsanlegrar útgöngu án samnings gætu orðið víðtæk en í fréttatímanum heyrum við í breskum gæludýraeigendum sem óttast að dýrin þeirra missi evrópsk vegabréf sín, verði að samningslausri útgöngu.

Þetta og margt fleira í kvöldfréttum á samtengdum rásum Stöðvar 2 og Bylgjunnar í opinni dagskrá klukkan 18:30.