Á tíunda tímanum í kvöld voru allar björgunarsveitir í Árnessýslu kallaðar út vegna tveggja týndra ferðamanna á Kjalvegi.



Fólkið sem um ræðir eru hjón. Þau höfðu lagt af stað í göngu frá Gíslaskála um miðjan dag í dag ásamt tveimur öðrum ferðamönnum. Urðu þau viðskila við hina tvo sem skiluðu sér aftur í skálann í kring um klukkan fimm í dag.



Klukkan átta náðist samband við parið í gegn um síma en hafði það ekki hugmynd um staðsetningu sína.



Í samtali við Vísi sagði Davíð Már Björgvinsson, upplýsingafulltrúi Landsbjargar, að nú rétt fyrir birtingu þessarar fréttar hefði aftur náðst samband við fólkið í gegn um síma og unnið væri að því að staðsetja þau með hjálp farsímamerkis.



Aðgerðum er stýrt í samstarfi við aðra viðbragðsaðila frá aðgerðastjórnstöðinni á Selfossi.