Barþjónn nauðgaði vinnufélaga og bauð 10 kokteila gegn fyrirgefningu

Héraðsdómur Reykjavíkur dæmdi í dag Eral Topal í 5 ára fangelsi fyrir tvær nauðganir. Í niðurstöðu dómsins segir að önnur nauðgunin hafi verið sérstaklega langvinn og heiftúðleg.

Topal er fæddur árið 1972 og er af tyrkneskum uppruna en hefur búið á Íslandi í meira en áratug. Fyrst nauðgaði hann konu sem hann hafði unnið með í um tvö ár eða frá því að hún var sautján ára. Það var í júlí 2015. Í dómnum kemur meðal annars fram að Topal reyndi að bjóða brotaþola kokteila til að bæta fyrir brot sitt dagana á eftir en hann er barþjónn að atvinnu og konan starfaði við þjónustustörf á sama vinnustað.

Tæpu ári síðar, eða í maí 2016, nauðgaði hann konu sem hann hafði hitt á skemmtistað í miðbænum. Í dómnum kemur fram að Topal beitti konuna ýmsu ofbeldi, tók hana kverkataki, hótaði henni lífláti og sló hana auk þess að halda henni fastri, afklæða hana og þröngva til samræðis. Að sögn nágranna stóðu öskrin í um klukkustund áður en lögreglu bar að garði.

Með brotum sínum braut Topal einnig gegn skilorði en hann var dæmdur í 6 mánaða skilorðsbundið fangelsi til tveggja ára fyrir líkamsárás árið 2014.

Topal er samkvæmt dómi gert að greiða fyrri konunni eina milljón króna í miskabætur en hinni 1,8 milljónir.

Lokað var fyrir ummæli við þessa frétt. Vísir hvetur lesendur til að halda sig við málefnalega umræðu.