Kanna hvort Sindri hafi verið í einni af rúmlega 40 vélum sem fóru frá Keflavík í morgun

„Það styttist í að hann finnist eða við fáum einhverja vitneskju um ferðir hans,“ segir Gunnar Schram, yfirlögregluþjónn á Suðurnesjum, um fangann Sindra Þór Stefánsson sem strauk af Sogni í nótt.

Sindri hefur sætt gæsluvarðhaldi frá 2. febrúar vegna rannsóknar lögreglu á umfangsmiklum þjófnaði á tölvubúnaði. Búnaðurinn er hluti af þýfinu í þremur innbrotum í gagnaver í Reykjanesbæ og í Borgarbyggð frá desember til janúar þar sem 600 tölvum að verðmæti 200 milljóna króna var stolið. Grunur leikur á að málið gæti teygt anga sína til annarra landa. 

Voru tölvurnar sérbúnar til að grafa eftir rafmyntinni Bitcoin.

Sjá einnig: Lofa sex milljóna króna fundarlaunum fyrir stolinn tölvubúnað

Sindri er íþróttamannslega vaxinn, með skolleit hár, skegghýjung og er 192 sentímetrar á hæð.

Allir þeir sem geta veitt upplýsingar um ferðir Sindra frá því klukkan eitt í nótt eru beðnir um að koma þeim á framfæri við lögregluna.

Talinn hafa flúið út um glugga

Lögreglan telur Sindra hafa flúið út um glugga á fangelsinu um klukkan eitt í nótt en lögreglan fékk vitneskju um flóttann um klukkan átta í morgun. Því liðu um sjö klukkustundir frá því Sindri er talinn hafa flúið fangelsið og þangað til lögreglan hóf leit.

Sogn er í Ölfusi, rétt hjá Hveragerði, en lögreglan segir Sindra hafa geta komist ansi langt á þeim tíma sem leið frá því hann strauk.

Lögreglan hefur enn ekki fengið staðfestingu á því hvort Sindri hafi komist úr landi. Gunnar Schram sagði í samtali við Vísi í morgun að lögreglan óttaðist að Sindri myndi reyna það.

40 vélar frá Keflavík

Gunnar segir tímafrekt að leita staðfestingar á því. Yfir fjörutíu farþegavélar fóru frá Keflavíkurflugvelli í morgun og er lögreglan að fara yfir gögn til að komast að því hvort Sindri hafi verið í einni af þeim vélum.

„Vonandi skilar þetta okkur staðfestingu á því hvort hann hafi farið í morgun eða ekki,“ segir Gunnar.

Kanna hvað hann gerði á Sogni

Sogn er opið fangelsi en fangelsismálastjóri sagði í samtali við Vísi fyrr í morgun að algengt væri að gæsluvarðhaldsfangar væru vistaðir þar. Færi það eftir því hvort þeir væru taldir hættulegir, en Sindri var ekki talinn hættulegur eða líklegur til að flýja þegar ákveðið var að vista hann á Sogni.

Gunnar Schram segir Sindra hafa haft einhvern aðgang að tölvu og síma í Sogni og verið sé að kanna hvernig hann notaði það. Þá er algengt að fangar komist yfir farsíma og fái þannig opnari aðgang að netinu. Verið sé að kanna hvort það hafi verið raunin hjá Sindra.

„Við erum að skoða allt sem er mögulegt að skoða,“ segir Gunnar.

Hann segir lögreglu ekki hafa borist nýtilegar ábendingar um ferðir Sindra enn sem komið er. Lögregluembættið á Suðurnesjum fer með rannsókn málsins í samstarfi við öll lögregluembætti landsins.