Veittist að eiginkonu sinni fyrir framan dóttur hennar

Héraðsdómur Norðurlands vestra hefur dæmt karlmann í 30 daga skilorðsbundið fangelsi fyrir að hafa veist að eiginkonu sinni fyrir framan dóttur hennar.

Brotið átti sér stað þann 28. nóvember í fyrra á heimilli mannsins. Veittist maðurinn að eiginkonu sinni, settist ofan á hana þar sem hún lá í anddyri íbúðarinnar og tók hana hálstaki.

Maðurinn var einnig ákærður fyrir brot á barnaverndarlögum, fyrir að hafa misboðið dóttur konunnar með því að veitast að móður hennar að henni aðsjáandi.

Maðurinn játaði brot sitt skýlaust fyrir dómi en gerði þó þá athugasemd að hann hafi ekki veist að eiginkonu sinni að fyrra bragði. Taldist sekt hans því sönnuð.

Maðurinn hefur ekki áður sætt refsingu.

Dóm héraðsdóms má lesa í heild sinni hér.