Þurfum að senda þau skilaboð að iðnnám loki engum leiðum
„Við þurfum að þora að leggja fjölbreytt mat á nemendurna sem koma úr skólakerfinu okkar og senda krökkum og foreldrum þau skilaboð að það loki ekki leiðum að velja iðnnám. Þetta eru skilaboð sem við verðum að senda því fólk er fast í þessari kreddu, að maður verði að hafa stúdentspróf,“ segir Áslaug Arna Sigurbjörnsdóttir, þingmaður Sjálfstæðisflokksins.
Hún hefur ásamt átta flokkssystkinum sínum lagt fram frumvarp á Alþingi um að sveinspróf verði metið til jafns við stúdentspróf sem inntökuskilyrði í háskóla.
„Það hefur ýmislegt verið gert til að efla iðnnám en við erum samt ekki að sjá neinar umtalsverðar breytingar á fjölda þeirra sem fara í iðnnám. Við þurfum að ráðast í miklu stærri breytingar. Þótt þetta frumvarp snúi aðeins að þessu eina atriði held ég að það yrði mikil breyting ef við færum að gefa stúdentsprófi og sveinsprófi sama vægi.“
Áslaug Arna bendir á að of miklar skorður séu settar á möguleika fólks til að sækja sér aukna menntun þótt háskólum yrði áfram í sjálfsvald sett að setja sérstakar inntökukröfur í einstaka greinum. „Það mun reynast okkur dýrmætt ef við fáum inn í háskólana fólk með fjölbreyttari bakgrunn.“
Hún segir að hér sé líka um ímyndarvanda að ræða. „Hluti þess vanda er sá að löggjafinn er búinn að ákveða að þetta sé svona. Löggjafinn á ekki að mismuna þessum námsleiðum.“
Í gær fór einnig fram sérstök umræða á Alþingi um stöðu iðnmenntunar þar sem Áslaug Arna var málshefjandi en Lilja Alfreðsdóttir mennta- og menningarmálaráðherra tók einnig þátt.
„Ráðherrann fór yfir ýmsar kerfisbreytingar sem unnið er að og tók vel í umræðuna. Ég vildi setja þetta á dagskrá því ég tel vandann alvarlegri en fólk gerir sér grein fyrir. Þrátt fyrir stafræna byltingu verður áfram þörf fyrir fólk með þessa færni og þekkingu þótt störfin breytist. Frumvarpið er hugsað sem eitt skref af mörgum sem þarf að taka.“
Hilmar Harðarson, formaður Samiðnar, segist fagna frumvarpinu. „Við höfum lengi sagt að við viljum hindranalaust nám og teljum að við fengjum meira streymi inn í iðngreinarnar með svona breytingu. Það er mjög mikilvægt að fá samfellu í framhaldsnámið.“
Hann segir að iðnmenntun ætti að nýtast vel sem grunnur inn í margt háskólanám og tekur sem dæmi verkfræði og arkitektúr. „Ef af þessu yrði myndi fjölbreytni í framhaldsnáminu aukast því það væri ekki bara fólk með stúdentspróf að koma inn í háskólana.“
Tengdar fréttir
Halda að iðnaðarstörfum fylgi óhreinindi, hávaði og kuldi
Bæta þarf ímynd iðnnáms hér á landi að mati sviðsstjóra hjá Samtökum iðnaðarins sem segir að ungt fólk sé upp til hópa með ranghugmyndir um eðli og fjölbreytni námsins
Lykilatriði sé að breyta viðhorfum foreldranna
Algjört hrun hefur orðið í fjölda útskrifaðra iðnnema frá hruni. Formaður Samtaka iðnaðarins segir þörf á að efla iðnmenntun i grunnskólum og breyta viðhorfi foreldra.
Stelpur á móti straumnum
Konur sem velja að læra karllægar iðngreinar eru fyrirmyndir yngri stelpna og annarra kvenna í samfélaginu. Það er ein niðurstaða átaksins #kvennastarf sem hófst í vor fyrir tilstilli allra iðn- og verkmenntaskóla landsins. Stúlkur í iðnnámi og aðrar sem hafa nýlokið slíku námi ræddu um stöðuna við blaðamann. Þær eru bjartsýnar á atvinnumöguleika sína og ánægðar með námið.
