Innlent

Einn fullorðinn og átta börn í hópferðabílnum

Birgir Olgeirsson skrifar
Frá vettvangi slyssins í gærkvöldi.
Frá vettvangi slyssins í gærkvöldi. Vísir
Fjórir eru á gjörgæslu eftir harðan árekstur tveggja bíla á Vesturlandsvegi á Kjalarnesi, skammt frá Enni, á áttunda tímanum í gærkvöldi. Um var að ræða árekstur fólksbíls og hópferðabifreiðar, en ökumaður fólksbílsins lést.

Níu voru í hópferðabifreiðinni, einn fullorðinn og átta börn. Öll voru þau flutt á sjúkrahús, fjórir á gjörgæslu og fimm á almenna deild.

Hinn látni, erlendur ríkisborgari búsettur hér á landi, var einn í fólksbílnum sem var ekið úr borginni en hópferðabílnum var ekið í átt að borginni.

Í janúar síðastliðnum varð banaslys á svipuðum slóðum þegar fólksbíll og flutningabíl rákust saman. Hinn látni var ökumaður fólksbílsins, karlmaður á fertugsaldri.

Vesturlandsvegi var lokað í um tvær klukkustundir í gærkvöldi, frá Þingvallavegi og að Hvalfjarðarvegi, á meðan vinna á vettvangi stóð yfir.

Óska eftir vitnum

Í tilkynningu frá lögreglu sem send var út á tólfta tímanum í dag kemur fram að erlendur ríkisborgari, karlmaður á fertugsaldri, sem búsettur var hér á landi hafi látist í slysinu. Hann var ökumaður fólksbifreiðarinnar.

Þá óskar lögregla eftir vitnum að árekstrinum. Þeir sem kunna að hafa orðið vitni að honum eða aðdraganda hans eru beðnir um að hafa samband við lögreglu í síma 444 1000 eða senda upplýsingar til lögreglu með tölvupósti á netfangið stella.mjoll@lrh.is.

Tilkynning lögreglu í heild:

Rannsókn stendur yfir á umferðarslysi á Vesturlandsvegi á Kjalarnesi, skammt frá Enni, á áttunda tímanum í gærkvöldi. Þar lentu saman fólksbifreið og sendibifreið.  Ökumaður fólksbifreiðarinnar, karlmaður á fertugsaldri, erlendur ríkisborgari, búsettur hér á landi, lést í slysinu. Níu einstaklingar, sem allir voru í sendibifreiðinni, voru fluttir á slysadeild þar af fjórir taldir alvarlega slasaðir. 

Í tengslum við rannsóknina óskar lögregla eftir vitnum að árekstrinum. Þeir sem kunna að hafa orðið vitni að honum eða aðdraganda hans og ekki hafa verið í sambandi við lögreglu, eru beðnir um að hafa samband við lögreglu í síma 444 1000 eða senda upplýsingar til lögreglu með tölvupósti á netfangið stella.mjoll@lrh.is

Uppfært klukkan 11:56 með upplýsingum frá Landspítalanum um að enn væru fjórir á gjörgæslu.


Tengdar fréttir

Banaslys á Kjalarnesi

Einn lést og níu slösuðust í hörðum árekstri tveggja bíla á Vesturlandsvegi á Kjalarnesi, skammt frá Enni, á áttunda tímanum í kvöld.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×