Skoða að banna framúrakstur í Hvalfjarðargöngunum

Ástæða gæti verið til að banna framúrakstur í Hvalfjarðargöngunum eins og víða er gert í jarðgöngum erlendis. Þetta kemur fram í skýrslu Rannsóknarnefndar samgönguslysa um banaslys sem varð í göngunum fyrir tveimur árum.

Tildrög slyssins voru þau að Toyota Landcruiser jeppi ók yfir á öfugan vegarhelming og í veg fyrir Subaru bifreið. Þetta gerðist í beygju um 700 metrum innan við syðri munna ganganna.

Virðist sem ökumaður Toyota jeppans hafi ekki brugðist við beygjunni þegar hann ók beint áfram þvert yfir akrein umferðar úr gagnstæðri átt og úr varð harður árekstur.

Í skýrslunni eru nefndar þrjár tillögur að umbótum í öryggismálum. Í fyrsta lagi þurfi að breikka rifflur sem hafa verið fræstar á milli akstursátta í göngunum. Þær virka með þeim hætti að þær mynda hávaða og titring þegar ekið er yfir þær og vara þannig ökumann við því að bifreiðin sé að fara yfir miðlínu.

Rifflurnar í Hvalfjarðargöngunum eru hins vegar aðeins 10 sentimetra breiðar og er það að mati nefndarinnar ekki nægilegt til að skila tilætluðum áhrifum. Skoðaðar voru útfærslur erlendis þar sem breiddin er á bilinu 20 til 50 sentimetrar.

Í öðru lagi er vakin athygli á því í skýrslunni að of stutt bil var á milli bifreiða í göngunum þegar slysið varð. Stutt bil á milli bifreiða minnki möguleika ökumanna á að bregðast við ef hætta skapast. Það sé sérstaklega mikilvægt í veggöngum þar sem gangnaveggir eru beggja megin við akbrautina og takmarkaðir möguleikar fyrir ökumenn að víkja til hliðar.

Nú þegar er minnsta leyfilega bil milli ökutækja í Hvalfjarðargöngunum 50 metrar og er það tilgreint með sérstöku umferðarmerki þegar ekið er inn í göngin. Í skýrslunni segir hins vegar að skiltið sé ekki áberandi og óvíst að ökumenn taki eftir því.

Loks er bent á að framúrakstur sé bannaður í jarðgöngum víða erlendis þar sem umferð í gagnstæðar áttir sé í sama gangaröri. Nefndin beinir því til veghaldara að fara yfir reglur um framúrakstur í göngunum og meta hvort æskilegt sé að herða þær með tilliti til umferðaukningar síðustu ára og umferðaröryggis í göngunum.