Innlent

Þúsundir sérfræðinga eftir sementssprengingu

Sigurður Mikael Jónsson skrifar
Sílóin fjögur reyndust sérlega rammgerð og hallast nú lítið eitt eftir umtalaða sprengingu Work North á Akranesi á laugardag.
Sílóin fjögur reyndust sérlega rammgerð og hallast nú lítið eitt eftir umtalaða sprengingu Work North á Akranesi á laugardag. vísir/anton brink
„Við vissum að þetta væri rammgert en þegar svona fer af stað þá eru allt í einu 10 þúsund sprengjusérfræðingar til á landinu,“ segir Þorsteinn Auðunn Pétursson, framkvæmdastjóri Work North ehf. sem sér um niðurrif á Sementsverksmiðjunni á Akranesi. Tilraun til að fella fjögur síló á lóð verksmiðjunnar með sprengjum mistókst síðasta laugardag en Þorsteinn segir að gert hafi verið ráð fyrir að það gæti gerst.

„Þeir fóru ekki niður í þetta skiptið en þetta var líka ein margra sviðsmynda sem við vorum með uppi því það var ekki vitað hversu óhemju mikil járnabinding og steypa væri þarna í.“

Þorsteinn segir að nú sé búið að stilla turnana af með fyrstu sprengingunni og vitað að þeir fari í þá átt sem þeir vildu að þeir færu.

Eins og fram hefur komið gerðu bæjaryfirvöld ekki ráð fyrir að ráðist yrði í framkvæmdirnar fyrr en á nýju ári og kom sprengingin því bæði stjórnendum og mörgum íbúum á óvart. Sævar Freyr Þráinsson, bæjarstjóri Akraness, sagði í Fréttablaðinu að þetta hefði gert það að verkum að bærinn hafi ekki getað sinnt upplýsingaskyldu sinni við bæjarbúa sem skyldi. Verktakinn vildi ekki draga athygli að sprengingunni til að tryggja öryggi fólks sem ætti til að safnast saman við slík tækifæri.

Framkvæmdin hefur verið gagnrýnd og sú staðreynd að vanmetið hafi verið hversu járnbent mannvirkið var. Nokkuð sem margir heimamenn segja að þeir hefðu getað sagt þeim sem vildu vita. Þorsteinn segir að farið hafi verið eftir teikningum, en margir verði sérfræðingar eftir á.

Aðspurður um reynslu fyrirtækisins af sprengjuniðurrifi segir Þorsteinn að Work North hafi keypt sér þjónustu sprengjusérfræðings fyrir verkið sem hafi séð um framkvæmdina. Nú sé verið að skoða næstu skref með þeim sérfræðingi og verkfræðingum.

„Þetta er ekkert mál. Við erum með svæðið tryggt, þetta er innan okkar verksvæðis og hluti af niðurrifinu. Þessir turnar fara auðvitað niður. Ef við þurfum að sprengja aftur þá gerum við það og tilkynnt verður um þá framkvæmd. Þetta er allt samkvæmt bókinni. Við gætum fyllsta öryggis og þetta er allt í samráði við opinbera eftirlitsaðila.“

Akranesbær sendi svo í gærkvöldi frá sér tilkynningu þess efnis að reyna ætti aftur við sílóin í dag.






Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.