Kári vill framlengja við Aberdeen

Kári Árnason vill skrifa undir nýjan samning við skoska úrvalsdeildarliðið Aberdeen.

Samningur Kára við Aberdeen rennur út eftir þetta tímabil. Íslenski landsliðsmaðurinn vill vera áfram hjá félaginu.

„Ég vonast til að fá nýjan samning. Ég elska lífið hjá Aberdeen og fæ vonandi áframhaldandi samning. Ég hef ekki átt í neinum viðræðum en vonandi fara þær af stað á nýja árinu,“ sagði Kári við Evening Express.

Kári kom til Aberdeen frá AC Omonia frá Kýpur í sumar. Hann lék áður með skoska liðinu tímabilið 2011-12.

Kári hefur leikið 14 leiki og skorað tvö mörk í skosku deildinni í vetur. Aberdeen situr í 2. sæti með 43 stig, átta stigum á eftir toppliði Celtic.