Höfuðborgarlistinn vill mannlega og góða borg

Oddviti nýstofnaðs Höfuðborgarlista hefur efasemdir um Borgarlínu, vill byggja Sundabraut sem fyrst og gera borgina mannlega og góða. Framboðið var kynnt fyrir utan Ráðhús Reykjavíkur síðdegis.

Framboðið á sér fremur stuttan aðdraganda, en listinn var formlega stofnaður fyrir 20 dögum síðan. Aðeins verður boðið fram í Reykjavík og er 46 manna listi frambjóðenda klár. Efstu þrjú sætin skipa Björg Kristín Sigþórsdóttir, framkvæmdastjóri og viðskiptafræðingarnir Sif Jónsdóttir og Snorri Marteinsson. Björg segist hafa talsverða reynslu af samskiptum í borgarkerfinu, og segir hana ekki eins og best verður á kosið.

„Ég ákvað bara að fara sjálf í málin, ég ætla bara að taka málin í mínar eigin hendur og ætla að breyta vinnubrögðum hér í borginni sem mér hugnast ekki,“ segir Björg.

Hvað er það helst sem þér hugnast ekki, og hvernig viltu breyta því?

„Ja, það er bara stjórnsýsla og hvernig er komið að íbúum. Við viljum bara að þetta sé mannleg og góð borg sem er vel stjórnað,“ segir Björg.

Hún segir listann skipaðan afar breiðri fylkingu fólks úr borginni.

„Þetta eru kennarar, leikskólakennarar, mannauðs- og mannfræðingar, jarðfræðingar. Þetta er bara alls konar fólk sem hefur mikla reynslu.“

Björg segir samgöngumál ofarlega á blaði, en hún vill ráðast í byggingu Sundabrautar fyrr en síðar. Þá hefur hún áhyggjur af óvissuþáttum tengdum fyrirhugaðri borgarlínu, sem hún telur að verði afar dýr framkvæmd.

„Svo er náttúrulega ekki vitað hvernig þetta mun vera rekið. Á meðan við getum ekki lagað holurnar í götunum, hvernig munum við þá geta byggt borgarlínu fyrir allan þennan pening? Ég spyr nú bara,“ segir Björg að lokum.