Sameinaður leikskóli í Grafarvogi hefur fengið nafn

Sameinaður leikskóli í Grafarvogi hefur fengið nafnið Nes. Um síðustu áramót voru tveir leikskólar í Staða- og Bakkahverfi í Grafarvog sameinaðir, leikskólarnir Hamrar og Bakki.

Í frétt á vef Reykjavíkurborgar segir að niðurstaða úr hugmyndasamkeppni liggi nú fyrir, en á vormisseri veltu foreldrar, börn og starfsfólk fyrir sér nafni á nýja leikskólann. Alls bárust 37 hugmyndir, en nafnahugmyndum var safnað í kassa sem settir voru upp í leikskólunum tveimur.

„Nafnanefnd fór yfir allar tillögur og lagði til að sameinaður leikskóli yrði látinn heita Nes, en starfsstöðvarnar tvær haldi sínum nöfnum; Hamrar og Bakki. Tillagan var samþykkt á fundi skóla- og frístundaráðs í dag.

Nafnið Nes má rekja til Geldingarness annars vegar og Álfsness hins vegar,“ segir í fréttinni.