Búið að mála yfir sjómanninn á Sjávarútvegshúsinu

Búið er að mála yfir stærðarinnar veggmynd af sjómanni sem prýddi austurvegg Sjávarútvegshússins við Skúlagötu 4. Veggurinn er nú skjannahvítur. Myndin var hluti verkefnisins Veggjaskáldskapur sem ýtt var úr vör í aðdraganda Iceland Airwaves-tónlistarhátíðarinnar árið 2015.

Götulistamönnum var úthlutað veggjunum sem þeir skreyttu, innblásnir af lagatextum hljómsveita. Myndin á vegg Sjávarútvegshússins var máluð af hópnum Evoca1 og var innblásin af texta lagsins Gonna Make Time með sveitinni Shaun & Starr. Myndirnar urðu alls tíu. Aðeins hefur verið hróflað við einu öðru verki en það prýddi hús í einkaeigu. 

Grímur Atlason, framkvæmdastjóri Iceland Airways, segir í samtali við fréttastofu að hvíti veggurinn hafi komið flatt upp á sig og að ekki hafi verið málað yfir sjómanninn í samráði við aðstandendur tónlistarhátíðarinnar, sem fjármagnaði verkið, eða listamennina. Myndirnar megi vera á húsunum eins lengi og eigendur húsanna vilja.  

Hér að neðan má sjá færslu sem Grímur birti í gær og sýnir breytinguna á veggnum.

Sigurður Guðjónsson, forstjóri Hafrannsóknarstofnunnar, segir í samtali við Vísi að ekki hafi staðið til að sjómaðurinn yrði langlífur. Upphaflega hafi einungis verið gert ráð fyrir því að verkið yrði á veggnum til eins árs.

Því hafi þó verið leyft að lifa í eitt ár í viðbót og málað yfir það nú í byrjun ágúst.

Aðspurður hvort ekki sé eftirsjá af sjómanninum segir Sigurður svo vera. „Ég sakna hans nú en það er eins og með margt annað í þessum heimi, sumir nágrannanna voru víst ekkert ánægðir með hann,“ segir forstjórinn.

Það helst í hendur við heimildir Vísis sem herma að það hafi ekki síst verið vegna óánægju íbúa í Skuggahverfinu með sjómanninn sem ákveðið hafi verið að mála yfir verkið.