Ófundinn í nauðgunarmáli

Ekki hefur tekist að hafa uppi á manni sem stefnt hefur verið í einkaréttarmáli og sakaður er um nauðgun sem átti sér stað á Ísafirði og Fréttablaðið hefur fjallað um. Stefna gegn honum hefur verið birt opinberlega.

Tveimur mönnum hefur verið stefnt til fullra bóta vegna málsins. Þeir eru báðir af erlendum uppruna en annar þeirra er enn búsettur hér á landi og hefur útvegað sér lögfræðing vegna málsins. Hinn maðurinn er, eins og áður segir, ófundinn.

Eftir því sem Fréttablaðið kemst næst hefur lögmaður konunnar reynt ítrekað að hafa uppi á manninum erlendis.

Að endingu var stefnan birt opinberlega en það þýðir að maðurinn gæti verið dæmdur til bótagreiðslu, þrátt fyrir að taka ekki til varna.