Blár strengur gegn ofbeldi á drengjum

„Rannsóknir sýna að allt að einn af hverjum sex drengjum verður fyrir kynferðisofbeldi,“ segir í bréfi sem sent hefur verið ýmsum opinberum aðilum þar sem óskað er eftir styrkjum við átaksverkefni til að vekja athygli á kynferðisofbeldi gagnvart drengjum.

Átaksverkefnið er á vegum nokkurra nemenda og kennara á heilbrigðisvísindasviði við Háskólann á Akureyri. Halda á ráðstefnu og vinnusmiðju á Akureyri með upphafsmönnum verkefnisins sem eru frá Ástralíu og Evrópu. Jafnframt á að efla starfsemi rannsóknarmiðstöðvar gegn ofbeldi sem nemendur og kennarar í HA komu á fót 2011.

Fjölmargir tónlistarmenn hafa þegar stillt gítara sína með bláum streng. Þungarokkssveitin Skálmöld með sínum þremur gítarleikurum eru allir með bláan streng eins og Bubbi Morthens, Magni og Hreimur Heimisson.

„Markmið rannsóknarmiðstöðvarinnar er að útrýma öllu ofbeldi, einkum gegn börnum og ofbeldi í nánum samböndum, meðal annars með samvinnu við stofnanir og félög hérlendis og erlendis,“ segir í bréfi aðstandenda verkefnisins. Einn þáttur þess er átaksverkefnið 1 Blárstrengur.

„Verkefninu „1 Blárstrengur“ er ætlað að vekja athygli á kynferðisofbeldi gagnvart drengjum, það er byggt á erlendri fyrirmynd sem hefur gefið góða raun þar sem því hefur verið hrundið í framkvæmd,“ segir í erindinu þar sem er, eins og fyrr segir, vitnað til rannsókna sem sýna að allt að einn af hverjum sex drengjum verður fyrir kynferðisofbeldi. „Vísar nafnið á verkefninu til sex strengja gítarsins en til að vekja athygli á átakinu er einum streng skipt út fyrir bláan streng.“

Þá kemur fram að kynferðisofbeldi hafi alvarlegar afleiðingar á líf milljóna um allan heim. Samfélagið geti ekki lokað augum og eyrum gagnvart þessum vanda. Karlmenn sem segi frá reynslu sinni upplifi bæði jákvæð og neikvæð viðbrögð.

„Allt of margir upplifa fordóma frá samfélaginu og eru því hræddir við að segja frá. Karllæg gildi, karlmennskuímyndin og staðalímyndir hafa áhrif þar á og þrátt fyrir að samfélagið viðurkenni að vandinn sé til staðar virðast karlmenn almennt ekki leita sér hjálpar vegna reynslu sinnar, því er mikilvægt að opna umræðuna.“ 

Fréttin birtist fyrst í Fréttablaðinu