Vill sannanir fyrir því að ráðherra hafi ekki farið fram með gerræðislegum hætti

Gunnar I. Guðmundsson, varaþingmaður Pírata, fór í dag fram á sannanir fyrir því að sjávarútvegsráðherra hafi ekki farið fram með „gerræðislegum hætti“ í sjómannadeilunni. Hann kallaði eftir sameiginlegri yfirlýsingu frá forystu sjómanna og ráðherranum.

Gunnar óskaði eftir svörum um hver óformleg aðkoma Þorgerðar Katrínar Gunnarsdóttur hafi verið að deilu sjómanna og útvegsmanna og vildi vita hvaða tilboð hún hafi lagt fram sem sjómenn hefðu ekki getað hafnað. Hann sagði þessi svör nauðsynleg svo „það sé hafið yfir allan vafa að ráðherrann hafi ekki farið fram með gerræðislegum hætti.“

Þorgerður Katrín ítrekaði í svörum sínum að deilan hafi verið leyst án formlegrar aðkomu ríkisins. Fyrst og fremst hafi hún lagt áherslu á þátt útgerðarinnar í deilunni.

„Það lá alveg ljóst fyrir af minni hálfu, og það var margítrekað í margra vikna samtölum, meðal annars við sjómannahreyfinguna og útgerðarmenn, að ég myndi ekki fara þá leið sem hefur verið nefnd sértæk leið, að endurvekja sjómannaafsláttinn með einum eða öðrum hætti,“ sagði Þorgerður.

„Ég var að reyna að tengjast kröfu sjómanna, sem var eðlilega hér á árum áður. Þá var eðlilegt, að minnsta kosti ekkert óeðlilegt við að menn hefðu hér sjómannaafslátt. En í dag eru viðhorfin önnur. Þannig að ég reyndi að tengja aðrar stéttir inn í slík hlunnindi. Fleiri heldur en sjómenn, með ákveðnum takmörkunum þó. Það verður að segjast eins og er að það er ekki hægt nema með aðkomu útgerðarinnar,“ bætti hún við.

Þorgerður tók jafnframt fram að aðalatriðið sé það að deilan sé leyst. Næstu skref séu að byggja upp traust á milli sjómanna og útvegsmanna. Það eigi að vera stóra málið í dag.