Fatlaður fær kennslu eftir áralanga baráttu

Akureyrarbær hefur viðurkennt rétt fjölfatlaðs drengs til heimakennslu í veikindum. Fréttablaðið greindi frá því á dögunum að bæjaryfirvöld hefðu neitað honum um kennslu og viljað skoða rétt sveitarfélagsins. Kostnaður fylgir því að kenna barni fjarri skólastofnun.

Kristján Logi Vestmann Kárason er ellefu ára, fatlaður og algjörlega háður öðrum með hreyfingu og allar athafnir daglegs lífs. Kristján hefur í gegnum árin fengið miklar öndunarfærasýkingar og því getur hann löngum stundum ekki verið innan um önnur börn.

Akureyrarbær neitaði Kristjáni Loga um þessi réttindi sín og ákváðu foreldrar hans að skjóta málinu til menntamálaráðuneytisins. Á fundi foreldra með bæjaryfirvöldum, lögfræðingi sveitarfélagsins, fræðslustjóra og formanni fræðsluráðs í vikunni kom fram að unnið yrði að málinu svo tryggt væri að réttindi hans yrðu virt á næsta skólaári.

„Lagalegur réttur hans á sjúkrakennslu var viðurkenndur á fundi með bæjaryfirvöldum í vikunni,“ segir Vera Kristín Kristjánsdóttir, móðir drengsins. „Okkur var lofað að hann muni fá sjúkrakennslu hér eftir og að fyrir næsta skólaár verði tilbúið verkferli, sem við höfum nú kallað eftir í nokkur ár, um útfærslu sjúkrakennslunnar.“

Samkvæmt reglugerð um nemendur með sérþarfir á nemandi, sem að mati læknis getur ekki sótt skóla vegna slyss eða langvarandi veikinda, rétt á sjúkrakennslu annaðhvort á heimili sínu eða á sjúkrastofnun.

Foreldrarnir eru að vonum ánægðir með málalyktir. „Þó það sé erfitt að þurfa að ganga svona langt til að tryggja réttindi barnsins er ljóst að það þurfti. Nú vonum við að þetta komi til með að standa næsta vetur,“ segir Vera Kristín.

Soffía Vagnsdóttir, fræðslustjóri á Akureyri, sagði á sínum tíma bæinn ekki geta veitt þessa þjónustu og vitnaði til fordæma í Reykjavík. „Sambærilegum beiðnum hefur verið hafnað annars staðar. Það þarf að ræða þessi mál og fá úr því skorið nákvæmlega hver réttur barna er,“ sagði Soffía.