Ríkisstjórnin hefur samþykkt að verja 4,6 milljónir króna af ráðstöfunarfé sínu til viðbótargreiðslna til hælisleitenda. Þetta var ákveðið á fundi ríkisstjórnarinnar í morgun.

Í tilkynningu frá forsætisráðuneytinu segir að undanfarin ár hafi umsækjendur um alþjóðlega vernd fengið greiðslu í desember til viðbótar við fastar framfærslugreiðslur. Ekki hafi verið til staðar reglur um þessar greiðslur, heldur hafi ákvörðun verið tekin hverju sinni og hafi þetta því ekki alltaf verið framkvæmt með sama hætti.

Nú njóta 518 umsækjendur um alþjóðlega vernd þjónustu hjá Útlendingastofnun og sveitarfélögunum Reykjavík, Reykjanesbæ og Hafnarfirði. Af þessum 518 eru 403 fullorðnir einstaklingar og 114 börn.

Haft er eftir Katrínu Jakobsdóttur forsætisráðherra að það sé ánægjulegt að ríkisstjórnin geti brugðist við með þessum hætti nú. „Mér finnst afar  mikilvægt að mál sem þessi séu í föstum farvegi til framtíðar litið þannig að ekki skapist óvissa eða mismunun frá einu ári til annars og við munum í framhaldinu vinna að því að það verði gert,“ er haft eftir forsætisráðherra.