Tillaga um úthlutun Hljóðritasjóðs samþykkt

Mennta- og menningarmálaráðherra hefur samþykkt tillögu stjórnar Hljóðritasjóðs um seinni úthlutun úr sjóðnum 2017. Hlutverk sjóðsins er að efla íslenska hljóðritagerð í tónlist með fjárhagslegum stuðningi við útgáfu hljóðrita.

Alls bárust níutíu umsóknir en þrjátíu og átta verkefni hljóta styrki að þessu sinni. Heildarúthlutunin er 14.850.000 krónur en styrkupphæðirnar eru á bilinu 150.000 til 1.000.000 krónur. Um er að ræða nítján popp- og rokk verkefni, sjö samtímatónlistarverkefni, fimm jazzverkefni og sjö af öðrum meiði.

Hæstu styrkina, upp á eina milljón króna, fengu Ólöf Helga Arnaldsdóttir fyrir verkefnið „Dags dagur“ og Record Records ehf. fyrir aðra breiðskífu Júníus Meyvant. Einnig má nefna að tónlistarkonan Hera Hjartardóttir fékk styrk upp á 650.000 fyrir verkefni sem snýr að nýrri plötu og hljómsveitin Árstíðir fékk styrk upp á 600.000 fyrir þeirra fimmtu breiðskífu.

Hluti umsækjanda fékk röng svarbréf

Starfsmenn sjóðsins gerðu mistök við úrvinnslu niðurstaðna og fékk hluti umsækjanda röng svarbréf í lok októbermánaðar. Mennta- og menningarmálaráðherra ákvað að afturkalla öll svarbréfin þar sem þau voru ekki í samræmi við niðurstöður stjórnar Hljóðritasjóðs og í framhaldinu staðfesti hann tillögu hennar.

Á vef Rannís kemur fram að farið verði yfir verkferla til að tryggja að slíkt endurtaki sig ekki.