2,7 milljónir í leigubíla frá ráðuneytum í ágúst

Átta ráðuneyti eyddu alls tæplega 2,7 milljónum króna í leigubílaferðir fyrir starfsfólk sitt í ágúst. Þetta er meðal þess sem kemur fram í yfirliti sem birt hefur verið á vefsíðunni opnirreikningar.is sem tekin var í gagnið í gær.

Tilgangur nýju vefsíðunnar er að bæta aðgengi að fjárhagsupplýsingum ríkisins þar sem skoða má yfirlit yfir greidda reikninga úr bókhaldi ráðuneyta nánast í rauntíma.

Í gær var birt yfirlit yfir ágústmánuð og þar er ein þjónusta sem virðist koma oftar fyrir en aðrar. Það eru reikningar fyrir viðskipti starfsfólks ráðuneytanna við leigubílafyrirtækið Hreyfil.

Ríkið er með tveggja ára samning um leigubílaakstur við Hreyfil eftir útboð Ríkiskaupa í fyrra. Leigubílana notar starfsfólk í erindagjörðum viðkomandi ráðuneyta, til dæmis ef komast þarf til fundar og er ætlast til að leigubílar séu notaðir á stórhöfuðborgarsvæðinu. Ef um lengri ferðir út á land er að ræða ber þó að leigja bílaleigubíla samkvæmt upplýsingum Fréttablaðsins.

Af þessum átta ráðuneytum sem nýttu sér þjónustu Hreyfils í síðasta mánuði stendur utanríkisráðuneytið upp úr. Starfsfólk þess eyddi langmest allra ráðuneyta, eða tæplega 1,6 milljónum króna. Munar þar mest um reikning frá 9. ágúst sem nemur alls ríflega 886 þúsundum króna.

Næst á eftir er velferðarráðuneytið með 377 þúsund krónur, atvinnuvega- og nýsköpunarráðuneytið eyddi 220 þúsund krónum og innanríkisráðuneytið 132 þúsundum.

Fréttablaðið leitaði skýringa á miklum kostnaði hjá utanríkisráðuneytinu sem segir eðlilegt að kostnaður vegna leigubíla sé mun hærri þar en hjá öðrum ráðuneytum. „Hluti af skyldum ráðuneytisins þegar kemur að heimsóknum erlendra gesta er að sjá um akstur.“

886 þúsund króna reikningurinn er sagður hafa fallið til í júní og sé tilkominn vegna tveggja viðburða. Annars vegar fundar utanríkisráðherra Eystrasaltsráðsins og móttöku aðmírálanna Johnstones og Townsends. Drjúgur hluti heildarupphæðarinnar komi til vegna hátíðarhaldanna 17. júní sem fjöldi erlendra sendiherra sótti. Bent er á að viðkomandi reikningar hafi verið bókaðir og greiddir í ágúst, en mestur kostnaður fallið til fyrr í sumar.

Ef kostnaður vegna leigubílaferða ráðuneytanna í ágúst er dæmigerður fyrir aðra mánuði er ljóst að ráðuneytin verja ríflega 32 milljónum í fargjöld með leigubílum á ári.