Forstjóri Hörpu sver af sér aðkomu að tug milljóna máli Sigur Rósar

Svanhildur Konráðsdóttir, forstjóri Hörpu, segist enga persónulega aðkomu hafa átt að málum er varða tugmilljóna greiðslu sem tónleikahaldarinn Kári Sturluson fékk af miðasölu á tónleika Sigur Rósar sem eiga að fara fram í desember.

Fréttablaðið sagði frá því í gær að 35 milljónir króna af miðasölu tónleikanna hefðu verið greiddar út til Kára sem hann mun síðan hafa ráðstafað í annað viðburðinum og hljómsveitinni óviðkomandi. Heimildir eru fyrir því að forstjóri Hörpu hafi komið að því að veita Kára fyrirframgreiðsluna. En slíkar greiðslur eru nokkuð sem kunnugir telja óeðlilegt. Svanhildur vildi ekki tjá sig um málið á þriðjudag er Fréttablaðið leitaði skýringa og spurði um hennar þátt. Það væri grundvallaratriði hjá Hörpu að tjá sig ekki um einstaka viðburði, viðskiptamenn eða samskipti við þá.

Í tölvupósti til Fréttablaðsins í gær sver Svanhildur af sér persónulega aðkomu að málinu. Segir hún Hörpu gera samninga við tónleikahaldara sem séu að fullu ábyrgir fyrir þeim viðburðum. Tónleikahaldarinn eigi miðasölu af þeim viðburði sem hann sé ábyrgur fyrir og samningar tónleikahaldara við listamenn séu án aðkomu eða ábyrgðar Hörpu. Farið hafi verið í einu og öllu að gildandi samningi. Kveðst hún ekki hafa haft nokkur samskipti við umræddan tónleikahaldara frá því miðasala fór af stað í maí og þar til nú í ágúst.

Kári Sturluson kvaðst í yfirlýsingu í gær hafa staðið við sinn hlut og vænta þess að aðrir aðilar samkomulagsins geri slíkt hið sama. Hann hefur ekki svarað ítrekuðum símtölum né skriflegri fyrirspurn þar sem óskað er eftir skýringum á þessum greiðslum.

Svanhildur vildi í gær ekki svara spurningum um málið. Í yfirlýsingu Hörpu og Sigur Rósar í gærkvöldi segir að unnið sé í anda samvinnu og trausts að tónleikunum.