Áhugamaður um blóm frumsýnir glænýja vefsíðu

Ný heimasíða um blómaflóru Íslands hefur litið dagsins ljós. Snorri Þór Tryggvason, arkitekt og ljósmyndari stendur að síðunni. „Mig langar bara að hjálpa fólki sem sér falleg blóm og langar að vita hvað þau heita,“ segir Snorri þegar hann er spurður um tilurð síðunnar.

Á heimasíðunni er hægt að finna ýmsar hagnýtar upplýsingar um hinar ýmsu blómategundir á ensku sem væntanlega munu koma erlendum ferðamönnum að góðum notum. Auk upplýsinga um blómategundir er hægt að kaupa póstkort með íslenskum blómategundum sem Snorri hefur ýmist handmálað eða myndað.

Afkastamikill listamaður

Snorri er bæði verkadrjúgur og fjölhæfur. Hann rekur fyrirtækið Borgarmynd og Iceland Aurorafilms ásamt því að vera arkitekt, ljósmyndari og höfundur myndskreytinga. Þegar blaðamaður Vísis hafði samband við Snorra og spurði hann út í nýju heimasíðuna vissi Snorri ekki hvaða síðu blaðamaður talaði um vegna þess að hann væri nýbúinn að opna fjórar heimasíður. Hann segir þó að síðan um flóru Íslands sé sín uppáhalds.

Falleg blóm eru allt um kring

Blómaáhugi Snorra kviknaði fyrir um það bil þremur árum síðan þegar hann var að störfum við kvikmyndaverkefni.

„Ég sinni tímafrekustu gerð kvikmyndagerðar því ég sérhæfi mig í „time-lapse“ myndatökum. Ég þarf stundum að sitja á sama staðnum frá hálftíma í allt að átta klukkutímum - það fer eftir því hvað ég er að mynda - og ég get ekki leyft mér að skilja nokkurra milljóna króna græjur eftir einar. Ég rölti alltaf nokkur hundruð metra frá þeim bara til að verða ekki klikkaður,“ segir Snorri og hlær. 

Það hafi einmitt verið á þessum göngum sem hann hafi tekið eftir öllum þessu fallegu blómum sem eru allt um kring.



Snorri segist einnig vera kortagerðarmaður og af þeim sökum þekki hann landið ansi vel. Á ferðum sínum um landið hafði hann komið auga á hin ótrúlegustu blóm á óvæntum stöðum.

Eyrarrós og Klettafrú í uppáhaldi

Spurður um sín uppáhalds blóm kveðst Snorri ekki getað gert upp á milli Eyrarrósar og Klettafrúar. „Það eru þessi ótrúlegu blóm. Þau eiga ekkert að vera þarna, “ segir Snorri sem finnst magnað að svona fínleg blóm þrífist í íslenskri náttúru. Hann tekur Eyrarrósina sem dæmi sem „er bleikt og frekar stórt, ótrúlega „delicate“ blóm sem lifir samt af einhverjar stórhríðir upp á hálendinu.“



Auk Eyrarrósarinnar finnst honum Klettafrú vera svakalega fallegt blóm en hún vex aðeins út úr klettum.

„Við leyfum ekkert svindl“

Á nýju heimasíðunni má finna póstkort sem Snorri er með til sölu. Að sögn Snorra er vinnuferlið strangt enda sé hann haldinn mikilli fullkomnunaráráttu. Snorri, kærastan hans og vinir handtína blómin sjálf.

„Við leyfum ekkert svindl. Það er ekki photoshop eða neitt svoleiðis. Þetta er handtínt og það verður að raða þessu niður á innan við klukkutíma og taka þá háskerpumynd sem endist vonandi næstu hundrað árin til að gleðja einhverja,“ segir Snorri sem auk þess handmálar ýmsar blómategundir með vatnslitum.