Lífeyrissjóðirnir fara að tilmælum Fjármálaeftirlits varðandi tilgreinda séreign

Framkvæmdastjóri Landsamtaka lífeyrissjóða segir ekki koma beint á óvart að Fjármálaeftirlitið telji ekki hægt að binda tilgreinda séreign félaga lífeyrissjóðanna við lífeyrissjóð þeirra. Hins vegar bjóði sjóðirnir upp á góða ávöxtun. Þeir sem þegar hafi ráðstafað tiltæku séreigninni geti alltaf breytt ákvörðun sinni.

Alþýðusamband Íslands og Samtök atvinnulífsins gerðu samkomulag í janúar í fyrra um ráðstöfun á hækkuðu mótframlagi vinnuveitenda við lífeyrisgreiðslur fólks á almennum vinnumarkaði. Mótframlagið hækkar í áföngum frá því í fyrra úr átta prósentum í 11,5 í júlí á næsta ári, eða samtals um 3,5 prósentustig.

Samkvæmt samkomulaginu skyldi þessi viðbót ýmist hækka hefðbundið framlag sjóðfélaga í þeirra lífeyrissjóð eða renna í svo kallaða tilgreinda séreign hjá þeim lífeyrissjóði sem hver og einn væri í. Þessa tilgreindu séreign væri hægt að taka út við sextíu og tveggja ára aldur og hún er erfanleg eins og séreignarlífeyrissparnaður fólks sem það getur ávaxtað þar sem því sýnist.

Í byrjun þessa mánaðar kynntu lífeyrissjóðirnir þessa nýjung sem tók gildi um síðustu mánaðamót. En nú hefur Fjármálaeftirlitið tilkynnt lífeyrissjóðunum að ekki sé löglegt að binda ávöxtun tilgreindu séreignarinnar við þann lífeyrissjóð sem viðkomandi er í. Fólki geti ráðstafað þessari eign með sama hætti og séreignarlífeyrissparnaðinum. 

Búast má við lagabreytingu í haust

Þórey S. Þórðardóttir, framkvæmdastjóri Landsamtaka lífeyrissjóða, segir þennan úrskurð Fjármálaeftirlitsins ekki beinlínis koma á óvart. Skiptar skoðanir hafi verið um þetta.

„Og það var spurningin hvort þetta væri lágmarks iðgjald sem sem ætti þar af leiðandi að fylgja þeim sjóðum sem þú ert að borga í sammkvæmt kjarasamningum eða hvort séreignarreglurnar ættu við. Það var umdeilt. Flestum fannst mjög mikilvægt að gerð yrði lagabreyting þannig að tekið yrði á þessu. Þannig að þessi staða kæmi ekki upp núna að um þetta væru skiptar skoðanir,“ segir Þórey.

Til hafi staðið að setja lög um þetta á vorþingi en það hafi ekki tekist og reikna megi með að frumvarp um þetta komi fram á Alþingi í haust. Lífeyrissjóðirnir muni bregðast við túlkun Fjármálaeftirlitsins.

„Að líkindum munu þeir leiðbeina sjóðfélögunum og verða við þessari túlkun Fjármálaeftirlitsins. Þeir eru í raun búnir að taka afstöðu til þess. Þannig að ég á ekki von á öðru en sjóðirnir fylgi þessari afstöðu Fjármálaeftirlitsins,“ segir Þórey.

Þeir sjóðfélagar sem nú þegar hafi ákveðið að ráðstafa tilgreindu séreigninni hjá lífeyrissjóðunum geti alltaf breytt þeirri ráðstöfun sinni. Hins vegar bjóði lífeyrissjóðirnir hvorki upp á verri né betri ávöxtun en aðir aðilar á markaðnum eins og til dæmis bankarnir.

„Þetta er náttúrlega mjög jákvætt fyrir sjóðfélaga að hafa að hafa ákveðið val. Sjóðirnir hafa verið að bjóða upp á ávöxtunarleiðir og annað í kring um þessa tilgreindu séreign.“

Þannig að þú telur ávöxtunarleiðir lífeyrissjóðanna séu ekkert verri en verið er að bjóða upp á hjá bönkunum og öðrum aðilum?

„Hvorki verri né betri. Sjóðirnir eru allir að vanda sig fyrir sína sjóðfélaga. Þannig að þeir eru að reyna að gera hlutina vel,“ segir Þórey S. Þórðardóttir.