Hjólreiðakeppnin Gullhringurinn stöðvuð vegna alvarlegs hjólreiðaslyss

Hjólreiðaslys varð á Skálholtsvegi við Brúará nú í kvöld. Fimm hjólreiðamenn skullu saman og er einn alvarlega slasaður. Á svæðinu fer nú fram hjólreiðakeppnin KIA Gullhringurinn en hún hefur verið stöðvuð.

Þorgrímur Óli Sigurðsson, aðstoðaryfirlögregluþjónn hjá lögreglunni á Suðurlandi, staðfesti í samtali við Vísi að um slys væri að ræða.

Hjólreiðaslys, varð þegar fimm hjólreiðamönnum lenti saman á Skálholtsvegi við Brúará, austan við gatnamótin milli Biskupstungna. Einn er alvarlega slasaður, þrír minna slasaðir og einn er talinn hafa sloppið ómeiddur.

Þyrla landhelgisgæslunnar hefur verið send á svæðið en vegur í kringum slysstað er nú lokaður.

Sjónarvottur segir mikinn viðbúnað á svæðinu. Einar Bárðarson, forsvarsmaður Gullhringsins, hafði áður talið að umferðarslys hefði orðið en mótshaldarar voru nýkomnir á staðinn þegar Vísir náði tali af Einari.

Fréttin hefur verið uppfærð.