Fært í Landmannalaugar og Sprengisandur að opnast

Hálendisvegir opnast óvenju snemma í ár. Kjalvegur og leiðin í Landmannalaugar urðu fær fyrir helgi og búist við að Sprengisandsleið opnist síðar í vikunni. Í fréttum Stöðvar 2 var rætt við G. Pétur Matthíasson, upplýsingafulltrúa Vegagerðarinnar, um ástand fjallvega.

Leiðin inn í Landmannalaugar um Sigöldu opnaðist síðastliðinn föstudag en fyrir ferðaþjónustuna er það orðið mikið hagsmunamál að vinsælir hálendisvegir opnist sem fyrst. Kjalvegur opnaðist einnig fyrir helgi en leiðin um Kaldadal þann 1. júní, sem er met. 

Fleiri leiðir að Fjallabaki opnast líklega á næstu dögum, eins og Dómadalsleið og Fjallabaksleið nyrðri. Þá er líklegt að fyrir helgi verði orðið fært inn að Lakagígum, um Sprengisand og í Öskju.

 Ástand fjallvega má sjá á hálendiskorti Vegagerðarinnar.