Vilja að ráðuneytið rannsaki meint einelti lögreglustjóra

Landssamband lögreglumanna hefur óskað eftir því að innanríkisráðuneytið rannsaki án tafar hvort Sigríður Björk Guðjónsdóttir, lögreglustjóri á höfuðborgarsvæðinu, hafi lagt starfsmenn sína í einelti. Frá þessu var greint í kvöldfréttum RÚV.

Þar kom fram að hátt í fimmtíu lögreglumenn og aðrir starfsmenn embættisins hafi kvartað undan samskiptum við lögreglustjórann, en að í bréfi þeirra hafi þeir krafist nafnleyndar af ótta við afleiðingarnar.

Landssambandið lýsir yfir þungum áhyggjum af stöðu mála í bréfi sínu til ráðuneytisins sem sent var undir lok síðasta árs og ítrekað í janúar. Þá séu dæmi um að starfsmenn hafi leitað sér sálfræðiaðstoðar og farið í veikindaleyfi eftir samskipti sín við lögreglustjóra.

Sigríður sagði í skriflegu svari við fyrirspurn RÚV að bréf lögreglumanna valdi sér áhyggjum. Hún hafi staðið fyrir umfangsmiklum breytingum hjá embættinu þar sem skipaðir afi verið nýir stjórnendur, ábyrgðarsviðum annarra breytt og stjórnunarstöðum í heildina hafi verið fækkað. Hún hafi skilning á því að ekki ríki alltaf full samstaða um slíkar breytingar, ekki frekar en um hver eigi að gegna starfi lögreglustjóra. Segir hún mikilvægt að draga úr þessum deilum.

Líkt og greint hefur verið frá hafa tilfæringar og brottvísanir í starfi verið óvenju tíðar hjá lögreglu undanfarin misseri og valdið yfirstjórn lögreglunnar á höfuðborgarsvæðinu erfiðleikum. Jafnframt hefur verið viðloðandi samskiptavandi yfirstjórnenda hjá lögreglunni.

Þeir starfsmenn lögreglunnar sem fréttastofa hefur rætt vegna málsins við segja ástandið innan embættisins afar slæmt og vilja að gripið verði inn í án tafar. Hins vegar þori fáir að stíga fram vegna hugsanlegra afleiðinga.