Hvergerðingar vara við innlendum skattaparadísum

Afnám lágmarksútsvars brýtur „gegn anda þess jafnræðis sem við sem þjóð viljum að ríki í okkar samfélagi“, segir bæjarráð Hveragerðis sem leggst eindregið gegn samþykkt frumvarps sem felur í sér afnám lagaákvæðis um lágmarksútvar.

Samkvæmt núgildandi lögum eiga sveitarfélög að innheimta að lágmarki 12,44 prósent af launum íbúa sinna í útsvar. Þrír þingmenn Sjálfstæðisflokks hafa nú lagt fram að nýju frumvarp um afnám þessara lágmarksprósentu. Þeir segja sveitarfélög þurfa að rækja lögbundið hlutverk sitt en óhófleg afskipti löggjafans séu óþörf og dragi úr valdi og ábyrgð sveitarstjórnarmanna til að leita hagkvæmustu leiða til þess.

Bæjarráð Hveragerðis minnir á í umsögn sinni um frumvarpið að Samband íslenskra sveitarfélaga og fjöldi sveitarfélaga hafi varað við samhljóða frumvarpi frá 2014.

„Frumvarpið virðist ekki snúast um að efla tekjustofna sveitarfélaga eða innbyrðis skiptingu þeirra heldur snýst það um að ákveðinn hópur launamanna á Íslandi skuli hafa möguleika á að sleppa að miklu eða öllu leyti við að greiða útsvar af launatekjum sínum þegar það tekur ákvörðun um búsetu,“ segir bæjarráð Hveragerðis og vitnar til umsagnar Sambands íslenskra sveitarfélaga frá 2014.

„Þar sem fámenn sveitarfélög hafa miklar tekjur af álagningu fasteignaskatts gætu þær aðstæður skapast að þau gætu lækkað álagningarhlutfall útsvars verulega eða jafnvel niður í 0 prósent ef lágmarksútsvar yrði afnumið með öllu. Það myndi skapa möguleika á innlendum skattaparadísum og tilheyrandi „gervibúsetu" með ófyrirsjáanlegum afleiðingum. íbúar þessara sveitarfélaga myndu því sleppa að miklu eða öllu leyti við að greiða útsvar af launatekjum sínum óháð upphæð launa.“

Flutningsmenn frumvarpsins eru þingmennirnir Vilhjálmur Árnason, Áslaug Arna Sigurbjörnsdóttir og Hildur Sverrisdóttir. 

Fréttin birtist fyrst í Fréttablaðinu