Leigubílum fjölgar ekki í takti við ferðamenn

Leigubifreiðum á Íslandi hefur ekki fjölgað síðan ferðamenn voru 100 þúsund. Þrátt fyrir gífurlega fjölgun ferðamanna eru leigubílaleyfin enn um 600 talsins og hefur ekki fjölgað í nokkur ár. Til að geta orðið leigubílstjóri þarf að gangast undir þrenns konar nám og próf auk þess að aka sem afleysingamaður hjá leyfishafa í 1.250-1.600 daga áður viðkomandi getur öðlast réttindi til að aka fólki gegn gjaldi.

Bifreiðastjórafélagið Fylkir og ­A-stöðin, leigubílar í Reykjanesbæ, sendu inn umsögn varðandi frumvarp um farþega- og farmflutninga þar sem þetta kemur fram.

Valur Ármann Gunnarsson, talsmaður Fylkis, segir að fjölmargir hafi vaðið inn á þeirra starfsvettvang og svört atvinnustarfsemi blómstri í ferðaþjónustunni. „Það er varla hægt að sjá bíla í dag nema með ferðamenn og enginn þeirra hefur leyfi til fólksflutninga. Það ríkir algert gullgrafaraæði hér. Við erum búin að funda með ríkisskattstjóra og lögreglu til að fá þá til að takast á við þetta,“ segir hann.

Í umsögn SBA-Norðurleiðar um frumvarpið er ósk um að nýta allt að átta manna bifreiðar í hópbifreiðaakstri og að eðalvagnaþjónusta falli ekki undir skilyrði um leigubílaakstur. „Rútufyrirtækjum er ekki heimilt að sækja farþega á hótel og skutla á BSÍ eða í Holtagarða. Við erum með ákveðinn einkarétt á flutningum á færri farþegum. Rútufyrirtæki eru að sækja einn og einn farþega og vilja nú fá að nota smærri bíla til að skutlast með farþega. Það er ekki þeirra starf.“

Valur bendir á að hver ferð sé laun leigubílstjóra. Séu aðrir að sinna þeirra störfum sé lítið til skiptanna. Þá sé starfsstéttin skattpínd.

„Við borgum fullt gjald af eldsneyti og virðisauka af viðhaldi og fleira og fleira. Rútufyrirtæki eru með niður­fellingu á virðisaukaskattinum. Lagaumhverfið hér er óstabílt og allir virðast geta farið inn á þetta svið án þess að löggjafinn og eftirlitsaðilar geri nokkurn skapaðan hlut. Það virðist vera að rútufyrirtæki hafi góðan hljómgrunn þessa stundina og í umsögn þeirra nota þeir að það sé óumhverfisvænt að skutlast með fáa á stórum bílum. Það er mikið bull í gangi og við hreinlega vitum ekki hvernig á að tækla svona vitleysu,“ segir Valur.

Fréttin birtist fyrst í Fréttablaðinu