Þess krafist að Gæsahúðarbækurnar verði fjarlægðar úr bókabúðum

Fram hefur komið kröfugerð þess efnis að Gæsahúðabækurnar eftir Helga Jónsson verði fjarlægðar úr bókabúðum og eru dæmi um að bókaverðir hafi tekið það upp hjá sjálfum sér að fjarlægja bækurnar úr bókasöfnum.

Brot úr bókinni Gæsahúð fyrir eldri - Villi Vampíra eftir Helga Jónsson, hafa nú gengið um samfélagsmiða og er varað eindregið við efni bókarinnar. Þannig birtir Bryndís Kolbrún Sigurðardóttir nokkrar myndir á sinni Facebooksíðu sinni og biður fólk að vera sér meðvituð um hvað börn okkar eru að lesa. Rúmlega þúsund manns hafa deilt færslu hennar, sem sjá má hér neðar. Á umræðuþræði við færslu Bryndísar kemur meðal annars fram að bókin hafi þegar verið fjarlægð úr bókasafni: „Gæsahúðarbækurnar eftir HJ hafa verið teknar úr umferð á Bókasafni Ölfuss. Verða afskráðar á morgun.“

Bókabúðum hafa borist fjöldi áskoranna þess efnis að þær hætti að selja Gæsahúðabækurnar. Egil Örn Jóhannsson framkvæmdastjóri Forlagsins staðfestir þetta.

„Í kjölfar mikillar gagnrýni í fjölmiðlum og ekki síst á samfélagsmiðlum vegna bókar sem kom út hjá Tindi, höfðu einhverjir samband við bókaverslun Forlagsins og kröfðust þess að Gæsahúðabækurnar yrðu allar teknar úr sölu. Við munum sannarlega fara yfir hvernig og fyrir hvaða aldur bækurnar eru flokkaðar í bókabúðinni en okkur finnst við verða að stíga afar varlega til jarðar áður en kemur að því beinlínis að taka tilteknar bækur úr sölu sökum innihalds,“ segir Egill.

Nokkur umræða hefur sprottið upp í tengslum við þetta og það hvort um ritskoðun eða jafnvel bókabrennur geti verið að ræða; hvort skáldskapur verði ekki að fá að lúta sínum lögmálum? Hvort ekki sé varasamt að bókstafleg merking sé lögð í skáldskap, hversu vondur sem hann má teljast og krefjast þess á þeim forsendum að hann sé tekinn úr umferð?

Eiríkur Örn Norðdal rithöfundur veltir málinu fyrir sér á sinni heimasíðu.

„Mótþróaröskunin í mér þolir svona lagað illa. Og þá hjálpar ekki til að innra með mér berjast tveir aðilar – rithöfundurinn með öll sín bókmenntaprinsipp og faðirinn sem vandar valið þegar hann kaupir bækur fyrir börnin sín.“

Þá skrifar Óli Gneisti Sóleyjarson pistil á Stundina þar sem hann segir skorta fé til að hafa umsjá með því hvernig bækur rata fyrir augu íslenskrar æsku. Þetta sé vandamál.